قازاقستاننىڭ ۇلتتىق بانكى كريپتوۆاليۋتا ايىرباستاۋ قىزمەتىن جۇزەگە اسىرۋعا ارنالعان العاشقى ليتسەنزيانى بەردى. رۇقساتتى Pax Finance كومپانياسى الدى. بۇل تۋرالى قارجى رەتتەۋشىسى ءوزىنىڭ Telegram-ارناسىندا جازدى، دەپ حابارلايدى "ادىرنا".
ليتسەنزياعا سايكەس، كومپانيا كريپتواكتيۆتەردى ساتىپ الۋ، ساتۋ جانە ساقتاۋ قىزمەتتەرىن كورسەتە الادى. سونىمەن قاتار بولىمشەلەر اشىپ، كريپتوماتتار ورناتۋعا قۇقىلى.
ۇلتتىق بانك 2026 جىلعى 1 مامىردان باستاپ قازاقستاندا تسيفرلىق اكتيۆتەر نارىعىنا قاتىسۋشىلاردى ليتسەنزيالاۋ جۇيەسى ەنگىزىلگەنىن ەسكە سالدى. ليتسەنزيا بەرۋ جانە تىركەۋ ماسەلەلەرى قارجى رەتتەۋشىسىنىڭ قۇزىرەتىنە جاتادى.
Forbes Kazakhstan مالىمەتىنشە، Pax Finance جشس-ءنىڭ قۇرىلتايشىلارى:
-
ارمان باتاەۆ – اۋديتور، OD Consulting كومپانياسىنىڭ باسقارۋشى سەرىكتەسى جانە Finmentor.kz Telegram-ارناسىنىڭ نەگىزىن قالاۋشى;
-
ازات بەكماعامبەتوۆ – كاسىپكەر، Paxaro Labs پەن PaxWallet.io كريپتواميانىنىڭ تەڭ قۇرىلتايشىسى;
-
ورىنگۇل ەسجانوۆا – اتىراۋ وبلىسىنداعى مۇناي سەرۆيستىك كومپانيالارمەن بايلانىستى كاسىپكەر.
قازاقستان زاڭناماسىنا سايكەس، كريپتوۆاليۋتا قىزمەتىنە ليتسەنزيا الۋ ءۇشىن كومپانيانىڭ جارعىلىق كاپيتالى كەمىندە 50 ميلليون تەڭگە بولۋى ءتيىس. سونداي-اق تاۋەكەلدەردى باسقارۋ جۇيەسى، كومپلاەنس-باقىلاۋ، كليەنتتەردى سايكەستەندىرۋدىڭ زاماناۋي راسىمدەرى جانە كيبەرقاۋىپسىزدىك شارالارى ەنگىزىلۋى قاجەت.
بۇدان بولەك، ليتسەنزيا بەرەر الدىندا ۇلتتىق بانك كومپانيا قۇرىلتايشىلارى مەن بەنەفيتسيارلارىنىڭ ىسكەرلىك بەدەلىن تەكسەرەدى.
ەسكە سالايىق، وتكەن جىلدىڭ ماۋسىم ايىندا ۇلتتىق بانك كريپتوبيرجالارداعى امياندارعا بايلانىستىرىلعان تولەم كريپتوكارتالارى جوباسىن ىسكە قوسقان بولاتىن. بۇل كارتالار پايدالانۋشىلارعا قولما-قول اقشاسىز تولەم جاساۋعا مۇمكىندىك بەرەدى. ول كەزدە «استانا» حالىقارالىق قارجى ورتالىعىندا بىرنەشە كريپتوسەرۆيس، ونىڭ ىشىندە Binance-ءتىڭ جەرگىلىكتى بولىمشەسى مەن Bybit كريپتوبيرجاسى تىركەلگەنى حابارلانعان.
