ۇلىبريتانيا پارلامەنتىنىڭ 50-دەن استام دەپۋتاتى ەلدىڭ مادەنيەت ءمينيسترى ليزا نانديگە رەسەيلىك «ماشا مەن ايۋ» ءمۋلتفيلمىن پلاتفورمالاردا كورسەتپەۋ جونىندە شارا قابىلداۋعا شاقىردى، دەپ حابارلايدى "ادىرنا" ۇلتتىق پورتالى BBC-گە سىلتەپ.
دەپۋتاتتاردىڭ ۇندەۋىنە Netflix پلاتفورماسىنىڭ ءمۋلتفيلمنىڭ سەگىزىنشى جانە توعىزىنشى ماۋسىمدارىن كورسەتۋ قۇقىعىن ساتىپ الىپ، الدىڭعى ماۋسىمدارعا ارنالعان ليتسەنزيانى الەمنىڭ 100-دەن استام ەلىندە ۇزارتۋ تۋرالى شەشىمى سەبەپ بولعان.
پارلامەنت مۇشەلەرىنىڭ پىكىرىنشە، مۋلتسەريال رەسەيدىڭ «جۇمساق كۇش» ساياساتىنىڭ قۇرالى رەتىندە قولدانىلىپ، بالالار اۋديتورياسىنا ناسيحاتتالۋدا.
نەگىزگى سىن 2010 جىلى جارىق كورگەن «شەكارا كۇزەتىندە» ەپيزودىنا قاتىستى ايتىلعان. وندا باستى كەيىپكەر ماشا كەڭەس قىزمەتكەرلەرىنىڭ باس كيىمىنە ۇقساس فۋراجكامەن، كەيىن تانكيست شلەمىمەن بەينەلەنگەن.
سونداي-اق دەپۋتاتتار 2015 جىلى Animaccord ستۋدياسىنىڭ اعىلشىن تىلىندەگى X الەۋمەتتىك جەلىسىندەگى پاراقشاسىندا ماشانىڭ كەڭەستىك اسكەري باس كيىممەن جاريالانعان سۋرەتى مەن «ەندى مەن اسكەردەمىن» دەگەن جازباسىن مىسالعا كەلتىرگەن. ولاردىڭ پىكىرىنشە، مۇنداي بەينەلەر بالالار اراسىندا كەڭەستىك اسكەري رامىزدەردى قالىپتى قۇبىلىس رەتىندە قابىلداۋعا ىقپال ەتۋى مۇمكىن.
قازىر مۋلتسەريال ۇلىبريتانيادا Netflix-پەن قاتار ITVX پلاتفورماسىندا دا كورسەتىلىپ كەلەدى. ۇندەۋ اۆتورلارى بالالارعا ارنالعان كونتەنتتى مۇقيات تەكسەرۋ قاجەت ەكەنىن اتاپ ءوتتى.
ال Animaccord ستۋدياسى تاعىلعان ايىپتاردى جوققا شىعاردى. كومپانيا ءوزىنىڭ جەكەمەنشىك ۇيىم ەكەنىن، مەملەكەتتىك قارجىلاندىرۋ المايتىنىن جانە 2025 جىلى رەسەيدەگى قىزمەتىن تولىق توقتاتقانىن ايتقان. ستۋديا وكىلدەرىنىڭ سوزىنشە، «ماشا مەن ايۋ» مۋلتسەريالى دوستىق، مەيىرىمدىلىك جانە ءوزارا سىيلاستىق تۋرالى باياندايدى جانە وندا ەشقانداي ساياسي استار جوق.
بۇعان دەيىن ەستونيا، ليتۆا، ۋكراينا جانە بىرقاتار باتىستىق ساراپشىلار اتالعان مۋلتسەريالدى رەسەيدىڭ مادەني ىقپال ەتۋ قۇرالى رەتىندە بىرنەشە رەت سىنعا العان.
