بۇگىن، 5 شىلدەدە «اق جول» دەموكراتيالىق پارتياسى سايلاۋالدى باعدارلاماسى مەن قۇرىلتاي دەپۋتاتتىعىنا كانديداتتار ءتىزىمىن بەكىتتى, دەپ حابارلايدى «ادىرنا» ءتىلشىسى.
پارتيالىق تىزىمگە ەلدىڭ بارلىق وڭىرىنەن كەلگەن وكىلدەر، كاسىپكەرلەر، ساراپشىلار قاۋىمداستىعىنىڭ مۇشەلەرى جانە قوعامدىق قىزمەتتىڭ ءتۇرلى سالالارىندا ەڭبەك ەتىپ جۇرگەن 63 ازامات كىرگەن. ولاردىڭ قاتارىندا VII جانە VIII سايلانعان ءماجىلىس دەپۋتاتتارى دانيا ەسپاەۆا، ازات پەرۋاشەۆ، ەرلان بارلىباەۆ، قازىبەك يسا، بەرىك دۇيسەمبينوۆ، سەرىك ەرۋباەۆ، ولجاس نۇرالدينوۆ جانە ەرلىك ومىرعالي بار.
سونداي-اق تىزىمگە قاراعاندى وبلىستىق ءماسليحاتىنىڭ دەپۋتاتى ەرمەك ءابىلدين، پەتروپاۆل قالالىق ءماسليحاتىنىڭ دەپۋتاتى ءلاززات جالمۇقانوۆا، سەمەي قالالىق ءماسليحاتىنىڭ دەپۋتاتى اناتولي كالينكين، VIII سايلانعان سولتۇستىك قازاقستان وبلىستىق ءماسليحاتىنىڭ دەپۋتاتى ەۆگەني كينتسەل، الماتى ۆەلوسپورت فەدەراتسياسىنىڭ پرەزيدەنتى اندرەي ليننيك، ادۆوكات سەرگەي ۋتكين جانە وزگە دە تۇلعالار ەنگەن.
سەزد بارىسىندا پارتيانىڭ «وزگەرىستەر قاجەت» اتتى سايلاۋالدى باعدارلاماسى تانىستىرىلدى. پارتيا توراعاسى دانيا ەسپاەۆانىڭ ايتۋىنشا، باعدارلاما پارتيانىڭ كوپجىلدىق باستامالارىن بىرىكتىرىپ، ەلدىڭ بولاشاق دامۋىنا قاتىستى كەشەندى كوزقاراستى ۇسىنادى. اتاپ ايتقاندا، وندا تاۋەلسىزدىك پەن ۇلتتىق مۇددەنى قورعاۋدان باستاپ، پارلامەنتاريزمدى نىعايتۋ، كاسىپكەرلىكتى قولداۋ، جەمقورلىقپەن كۇرەس، ادامي كاپيتالدى، زاماناۋي تەحنولوگيالار مەن ەركىن نارىقتىق ەكونوميكانى دامىتۋعا دەيىنگى باسىم باعىتتار قامتىلعان.
