استانادا وتكەن «اق جول» دەموكراتيالىق پارتياسىنىڭ سەزىندە پارتيانىڭ ساياسي باعدارلاماسىنداعى نەگىزگى باعىتتار ايتىلدى.
سەزد بارىسىندا پارتيا وكىلدەرى كاسىپكەرلەردى قولداۋ، وتاندىق بيزنەستىڭ مۇددەسىن قورعاۋ، الەۋمەتتىك ماسىلدىق پەن جالاڭ پوپۋليزمگە جول بەرمەۋ ماسەلەلەرىن كوتەردى.
«اق جول» پارتياسى فراكتسياسىنىڭ مۇشەسى قازىبەك يسا پارتيانىڭ باستى ۇستانىمدارىنىڭ ءبىرى كاسىپكەرلەردى قولداۋ ەكەنىن اتاپ ءوتتى.
ءبىزدىڭ باستى باعىتتارىمىزدىڭ ءبىرى – كاسىپكەرلەردى قولداۋ. كاسىپكەرلىك كودەكستى جاساعان دا «اق جول» پارتياسى. قازىر كاسىپكەرلىكتى قولدايمىز دەپ شىعاتىن پارتيالار بار. الايدا ءسوزى مەن ءىسى ەكى بولەك پارتيالاردى دا كورىپ ءجۇرمىز. ناقتى كاسىپكەردىڭ مۇددەسىن قورعاۋدىڭ ورنىنا، قارسى بولىپ، باسقا پارتيالارعا تاس اتىپ جاتقاندار دا بار. كىمنىڭ كىم ەكەنىن حالىق ءوزى بىلەدى. كىمنىڭ ەڭبەگى ناقتى، كىمدىكى جالعان ەكەنىن دە جۇرت جاقسى تۇسىنەدى. ءبىزدىڭ ءسوزىمىز بەن ءىسىمىز ءبىر پارتيا ەكەنىمىزدى حالىق بىلەدى، – دەدى قازىبەك يسا.
ال «اق جول» قدپ قاراعاندى وبلىستىق فيليالىنىڭ توراعاسى ەرمەك ءابدىلدين كەيبىر ساياسي كۇشتەردىڭ ناقتى زاڭنامالىق باستامانىڭ ورنىنا پيارعا كوبىرەك ءمان بەرەتىنىن ايتتى.
ونىڭ سوزىنشە، كاسىپكەرلەرگە قولداۋ كورسەتۋ قۇر ۇرانمەن ەمەس، ناقتى زاڭ جوبالارى مەن جۇيەلى شەشىمدەر ارقىلى جۇزەگە اسۋى كەرەك.
مۇنىڭ ورنىنا دابىرا سۇحباتتار، پيار-اكتسيالار جانە ءىرى كاپيتالدىڭ مۇددەسىن لوببيلەۋ بار. ولار شىن مانىندە نە ىستەدى؟ زاڭداردىڭ ورنىنا دابىرا مالىمدەمەلەر جاسالدى. ناقتى ءىستىڭ ورنىنا سۇحبات بەرىپ، فورۋمدار جيناپ، «ديالوگ الاڭدارىن» وتكىزدى. بىراق ماجىلىسكە ەنگىزىلگەن ناقتى زاڭ جوبالارى قايدا؟ كاسىپكەردىڭ ءومىرىن شىنىمەن جەڭىلدەتكەن تۇزەتۋلەر قايدا؟ – دەدى ەرمەك ءابدىلدين.
ول «اق جول» پارتياسى ۇزاق جىلدار بويى وتاندىق بيزنەستىڭ مۇددەسىن قورعاپ كەلە جاتقانىن اتاپ ءوتتى.
ءبىزدىڭ پارتيا ۇزاق جىلدار بويى وتاندىق بيزنەستىڭ مۇددەسىن قورعاۋمەن اينالىسىپ كەلەدى. ءبىز بيزنەستىڭ وزىنەن كەلدىك. بۇل ءوزىن بيزنەسمەن ءارى ساياساتكەر ساناپ جۇرگەن ءتۇرلى بلوگەرلەردەن ايىرماشىلىعىمىز، – دەدى ول.
سەزدە الەۋمەتتىك ماسىلدىق پەن جالاڭ پوپۋليزم ماسەلەسى دە كوتەرىلدى.
«اق جول» دەموكراتيالىق پارتياسىنىڭ بەلسەندى مۇشەسى، پارتيا اتىنان سايلانعان ماڭعىستاۋ وبلىستىق ءماسليحاتىنىڭ دەپۋتاتى بەكنۇر بيسەنوۆ كەيبىر پارتيالاردىڭ ەكونوميكالىق نەگىزى جوق ۋادە بەرەتىنىن ايتتى.
كەيبىر پارتيالار ء«بىز ءىشىپ، جەيىك، ال بارىنە مەملەكەت تولەسىن دەگەن» جالاڭ ءپوپۋليزمدى العا تارتادى. كەز كەلگەن ماسەلەنىڭ شەشىمى رەتىندە جاردەماقىنى كوبەيتۋ، سۋبسيديانى ارتتىرۋ نەمەسە مەملەكەتتىڭ ەكونوميكاداعى ءرولىن كۇشەيتۋ ۇسىنىلادى. ياعني بارلىق جاۋاپ ءبىر عانا ويعا تىرەلەدى: «مۇنى مەملەكەت جاساۋى كەرەك»، «مۇنى مەملەكەت قارجىلاندىرۋى كەرەك». بۇل الەۋمەتتىك ماسىلدىقتى ۇدەتىپ، مەملەكەتتى جارعا تىرەيتىن قيسىنسىز، ەسەپسىز پوپۋليزم!، – دەيدى ول.
