قازاقستانداعى قۇرىلتاي سايلاۋى جوعارى دەڭگەيدە ۇيىمداستىرىلدى، اشىق ءارى جاريا تۇردە ءوتتى. بۇل تۋرالى قىتاي حالىق رەسپۋبليكاسىنىڭ الماتىداعى باس كونسۋلى سۋ فانتسيۋ حالىقارالىق باقىلاۋشىلار مەن شەتەلدىك باق وكىلدەرىنە جاردەمدەسۋ ورتالىعىندا وتكەن بريفينگتە مالىمدەدى.
ديپلوماتتىڭ ايتۋىنشا، حالىقارالىق باقىلاۋشىلار الماتى قالاسىنىڭ بىرنەشە سايلاۋ ۋچاسكەسىن ارالاپ، ونىڭ ىشىندە №204, №361 مەن №622 ۋچاسكەلەرىنە ارنايى بارعان. باقىلاۋ بارىسىندا ولار كوميسسيانىڭ جۇمىسىمەن، داۋىس بەرۋدى ۇيىمداستىرۋ تارتىبىمەن تانىسىپ، سايلاۋشىلارعا قانداي جاعداي جاسالعانىن ءوز كوزىمەن كورگەن. ول اۋماقتىق سايلاۋ كوميسسياسىنىڭ وكىلدەرى باقىلاۋشىلاردىڭ جۇمىسىنا كاسىبي تۇردە قولداۋ كورسەتىپ، بارلىق سۇراققا جەدەل جاۋاپ بەرىپ وتىرعانىنا ءتانتى بولىپتى.
«بۇل سايلاۋدىڭ بارىنشا اشىق ءارى جاريا ءوتىپ جاتقانىن اتاپ ءوتۋ كەرەك. قازاقستان حالىقارالىق باقىلاۋشىلاردىڭ جۇمىس ىستەۋى ءۇشىن بارلىق قاجەتتى جاعدايدى جاسادى، داۋىس بەرۋ بارىسى دا قالىپتى ءارى ۇيىمداسقان تۇردە، ەڭ باستىسى قر كونستيتۋتسياسى مەن زاڭناماسىنا، سونداي-اق حالىقارالىق تاجىريبەگە تولىق سايكەس ءوتىپ جاتىر»، – دەيدى سۋ فانتسيۋ.
باس كونسۋلدىڭ ايتۋىنشا، سايلاۋ ۋچاسكەسىندە ازاماتتار ەرەكشە بەلسەندىگىمەن كوزگە تۇسكەن. دەمالىس كۇنى بولعانىنا قاراماستان، الماتى تۇرعىندارى داۋىس بەرۋگە ءبىر كىسىدەي قاتىسىپ جاتىر. باقىلاۋشىلار باق وكىلدەرىنىڭ بەلسەندىلىگىنە دە كوڭىل اۋداردى. ولاردىڭ پىكىرىنشە، بۇل سايلاۋ ناۋقانىنىڭ اشىقتىعىن قامتاماسىز ەتەتىن ماڭىزدى ەلەمەنتتىڭ ءبىرى ەكەن.
حالىقارالىق ميسسيا سايلاۋدىڭ زاڭدىلىعىنا نەمەسە اشىقتىعىنا كۇمان كەلتىرۋگە نەگىز بولاتىن زاڭ بۇزۋشىلىقتى تىركەمەگەن.
«سايلاۋ بارىسىنا كۇمان كەلتىرەتىن زاڭ بۇزۋشىلىقتى انىقتاعان جوقپىز. قىتاي تاراپى قازىرگى سايلاۋدىڭ دەموكراتيالىق تالاپتارعا تولىق سايكەس كەلگەنىنە كوز جەتكىزدى. قازاقستان دامۋدىڭ جاڭا كەزەڭىنە قادام باسقانىنا سەنىمدىمىن»، – دەپ تولىقتىردى ديپلومات.
جۋرناليستەردىڭ سۇراعىنا ءۇن قاتا وتىرىپ، سۋ فانتسيۋ قىتايدىڭ ستراتەگيالىق سەرىكتەسى قازاقستاننىڭ دامۋ بارىسىن مۇقيات باقىلاپ جۇرگەنىن، ەكى ەل اراسىنداعى پارلامەنتارالىق ىنتىماقتاستىقتىڭ ودان ءارى نىعايا تۇسەتىنىن زور سەنىمىن ءبىلدىردى.
سونداي-اق، ول زاڭ شىعارۋشى ورگاندارىنىڭ ماڭىزىنا بولەك توقتالىپ، قازاقستاننىڭ ءبىر پالاتالى پارلامەنتتىك جۇيەگە كوشۋى تاجىريبەسى ەكى جاقتى بايلانىستى دامىتۋعا قوسىمشا مۇمكىندىكتەرگە جول اشاتىنىن جەتكىزدى.
ءوز ءسوزىن باس كونسۋل تىلەكپەن تۇيىندەدى. ول قازاقستانعا سايلاۋدى تابىستى وتكىزىپ، ەلىمىزدىڭ ودان ءارى وركەندەي بەرۋىن، ەكى مەملەكەت اراسىنداعى ستراتەگيالىق ارىپتەستىككە تولاعاي تابىس تىلەدى.
