قازاقستان مىس وندىرەتىن جەتەكشى ەلدەردىڭ وندىعىنا كىرۋى مۇمكىن

مەملەكەت باسشىسى اقتوعاي مىس بالقىتۋ زاۋىتىنىڭ قۇرىلىسى تۋرالى ايتتى، دەپ حابارلايدى "ادىرنا".

پرەزيدەنتتىڭ ايتۋىنشا، جاڭا كاسىپورىن جىلىنا 300 مىڭ توننا كاتودتى مىس وندىرەدى. بۇل ىشكى نارىقتىڭ سۇرانىسىن تولىق قامتاماسىز ەتۋگە مۇمكىندىك بەرەدى. سونىمەن قاتار زاۋىتتا التىن مەن كۇكىرت قىشقىلى دا وندىرىلمەك.

مەملەكەت باسشىسى قازاقستاننىڭ مينەرالدىق-شيكىزات الەۋەتىن ءتيىمدى پايدالانۋ ەل ەكونوميكاسىن دامىتۋدا ماڭىزدى ءرول اتقاراتىنىن اتاپ ءوتتى.

«ەلىمىزدە 9,5 مىڭنان استام كەن ورنى بار. قازاقستاندا جىلىنا شامامەن 160 ميلليون توننا كەن وندىرىلەدى. 3,5 ميلليون تونناعا جۋىق مىس كونتسەنتراتى شىعارىلادى»، – دەدى قاسىم-جومارت توقاەۆ.

پرەزيدەنت وڭدەۋ ونەركاسىبىنىڭ دامۋ قارقىنىنا دا توقتالدى. بىلتىر سالاداعى جالپى ءونىم كولەمى 60 ميلليارد دوللارعا جەتكەن. سوڭعى ءۇش جىلدا ەلىمىزدىڭ بارلىق وڭىرىندە 540 يندۋستريالىق جوبا ىسكە قوسىلىپ، 50 مىڭ تۇراقتى جۇمىس ورنى اشىلعان.

سونداي-اق مەملەكەت باسشىسى كاسىپورىن اكتسيونەرلەرىنە جۇمىسشىلاردىڭ الەۋمەتتىك قاجەتتىلىكتەرىن قامتاماسىز ەتۋ مىندەتىن جۇكتەدى. ۇكىمەت پەن جەرگىلىكتى بيلىك وكىلدەرىنە ەڭبەك ۇجىمدارىمەن تىعىز بايلانىس ورناتۋ قاجەتتىگىن ەسكەرتتى.

بۇعان دەيىن قاسىم-جومارت توقاەۆ قىتايدىڭ China Nonferrous Metal Mining (CNMC) كومپانياسى ديرەكتورلار كەڭەسىنىڭ توراعاسى ۆەن گاندى قابىلداعان بولاتىن. كەزدەسۋدە اقتوعاي كەن ورنىندا مىس بالقىتۋ زاۋىتىنىڭ قۇرىلىسى قازاقستاننىڭ وڭدەۋ ونەركاسىبىن دامىتۋعا جانە ەكى ەل اراسىنداعى ونەركاسىپتىك ىنتىماقتاستىقتى نىعايتۋعا ىقپال ەتەتىنى ايتىلدى.