سوڭعى كۇندەرى ەۋروپانىڭ بىرقاتار ەلىندە ورمان ورتتەرى مىڭداعان گەكتار اۋماقتى شارپىدى. 5 شىلدە، جەكسەنبى كۇنى فرانتسيا، گرەكيا، يسپانيا جانە پورتۋگاليادا جۇزدەگەن ءورت ءسوندىرۋشى ءتىلسىز جاۋمەن كۇرەستى، دەپ حابارلايدى «ادىرنا» ءتىلشىسى DW-گە سىلتەمە جاساپ.
فرانتسيانىڭ وڭتۇستىگىندە زارداپ شەككەندەر بار
فرانتسيانىڭ شىعىس پيرەنەي دەپارتامەنتىندەگى ءورت 4 شىلدە كەشىندە پەرپينيان قالاسىنىڭ ماڭىنداعى جەتۋى قيىن اۋماقتا انىقتالعان. AFP اگەنتتىگىنىڭ مالىمەتىنشە، ءورتتى سوندىرۋگە شامامەن 700 ءورت ءسوندىرۋشى، 200 تەحنيكا جانە ونعا جۋىق ۇشاق پەن تىكۇشاق جۇمىلدىرىلعان.
ءورت سالدارىنان ەكى ادام – ءبىر ءورت ءسوندىرۋشى مەن جەرگىلىكتى تۇرعىن اۋىر جاراقات العان.
شىعىس پيرەنەي بيلىگى بەس مىڭ تۇرعىندى ەۆاكۋاتسيالاۋ تۋرالى شەشىم قابىلدادى. دەپارتامەنت پرەفەكتىسى رەنو دە لا موتتىڭ ايتۋىنشا، ايرىقشا اۋقىمداعى ورمان ورتىمەن كۇرەسۋ ءۇشىن ورتكە قارسى قىزمەتتەردەن بولەك، ىشكى قاۋىپسىزدىك قۇرىلىمدارى مەن مەملەكەتتىك ورگانداردىڭ بارلىق رەسۋرستارى تارتىلعان.
6 شىلدەدەگى جاعداي بويىنشا فرانتسيانىڭ تاعى 41 دەپارتامەنتىندە ءورت قاۋپى جوعارى دەڭگەيدە ساقتالىپ وتىر. ونىڭ جەتەۋىندە قاۋىپتىڭ ەڭ جوعارى دەڭگەيى جاريالانعان.
گرەكيادا زاۋىت ورتەنىپ، تۇرعىندار ەۆاكۋاتسيالاندى
گرەكيانىڭ سالونيكي قالاسى ماڭىنداعى قالدىقتاردى قايتا وڭدەۋ زاۋىتىندا ءورت شىققان. قالىڭ قارا ءتۇتىن قالا ورتالىعىنا دەيىن جەتكەن.
بيلىك تۇرعىنداردى تەرەزەلەرىن جاۋىپ، سىرتقا شىقپاۋعا شاقىردى. سونداي-اق ءۇش ەلدى مەكەننىڭ تۇرعىندارى مەن كۇتىمدى قاجەت ەتەتىن 157 ادام تۇراتىن مەكەمە ەۆاكۋاتسيالاندى.
ورەوكاسترون قالاسىنىڭ بيلىگى ءورتتىڭ ابايسىزدا تۇتانۋىنا قاتىسى بولۋى مۇمكىن دەگەن كۇدىكپەن 76 جاستاعى ەر ادامدى ۇستاعانىن حابارلادى.
سونىمەن قاتار افينانىڭ باتىسىندا تاعى ءبىر ءىرى ورمان ءورتى تىركەلدى. ورتپەن 210 ءورت ءسوندىرۋشى، ەرىكتىلەر جانە ارنايى اۆياتسيا كۇرەسىپ جاتىر.
يسپانيا مەن پورتۋگالياداعى جاعداي
يسپانيانىڭ سولتۇستىك-شىعىسىنداعى جيرونا پروۆينتسياسىندا 3 شىلدەدەن بەرى ورمان ءورتى جالعاسۋدا. EFE اگەنتتىگىنىڭ مالىمەتىنشە، جالىن شامامەن 2200 گەكتار اۋماقتى شارپىعان.
ال پورتۋگاليانىڭ ۆوزەلا مۋنيتسيپاليتەتىندە 2 شىلدەدە باستالعان ءورتتى سوندىرۋگە 1200 ءورت ءسوندىرۋشى، 400 تەحنيكا جانە 15 ۇشاق تارتىلعان. جالىن 12 مىڭ گەكتاردان استام اۋماققا تاراعان.
3 شىلدەدە يسپانيا پورتۋگالياعا كومەك رەتىندە 120 ءورت ءسوندىرۋشى مەن 45 تەحنيكا جىبەرگەن. 5 شىلدەگە قاراي ءىرى ءورت وشاقتارىنىڭ باسىم بولىگى وقشاۋلانعانىمەن، كەيبىر اۋماقتا ءورت ءالى تولىق سوندىرىلمەگەن.
ەۋروپانىڭ بىرنەشە ەلىندەگى ورتتەر ماۋسىم ايىندا باستالعان اپتاپ ىستىقتىڭ اياسىندا ءورشىپ وتىر.
