قازاقستاننىڭ ءۇش وڭىرىندە بەنزين تۇتىنۋ كولەمى كۇرت وسكەن، دەپ حابارلايدى "ادىرنا" ۇلتتىق پورتالى.
بۇل تۋرالى 7 شىلدەدە ەنەرگەتيكا ۆيتسە-ءمينيسترى قايىرحان تۇتقىشباەۆ حابارلادى.
ونىڭ ايتۋىنشا، بەنزينگە سۇرانىستىڭ ارتۋى باتىس قازاقستان، پاۆلودار جانە اقتوبە وبلىستارىندا بايقالىپ وتىر. اتالعان وڭىرلەردىڭ بارلىعى شەكارا ماڭىندا ورنالاسقان.
«باتىس قازاقستان، پاۆلودار جانە اقتوبە وبلىستارىندا بەنزين تۇتىنۋ كۇرت ءوستى. بۇل – شەكارالىق اۋماقتار»، – دەدى ۆيتسە-مينيستر.
سونداي-اق وزگە مەملەكەتتىك ورگاندارمەن بىرلەسىپ، جانار-جاعارماي ماتەريالدارىن زاڭسىز سىرتقا شىعارۋدىڭ جولىن كەسۋ باعىتىندا جۇمىستار جۇرگىزىلۋدە.
ول كەيبىر ازاماتتاردىڭ كولىكتەرىنە قوسىمشا جانارماي باكتارىن ورناتىپ، وتىندى زاڭسىز تاسىمالداۋعا ارەكەت ەتەتىنىن اتاپ ءوتتى.
«مۇنداي جاعدايلار بىزگە بەلگىلى. زاڭسىز جانار-جاعارماي شىعارۋعا قارسى جۇمىستار تۇراقتى تۇردە جۇرگىزىلىپ، ماسەلە تۇراقتى باقىلاۋدا تۇر»، – دەدى ەنەرگەتيكا ۆيتسە-ءمينيسترى.
