قازاقستان ۇكىمەتى مەملەكەتتىك تۋدى پايدالانۋ شارتتارىن بەكىتتى، دەپ حابارلايدى "ادىرنا" ۇلتتىق پورتالى.
قۇجاتتا ازاماتتاردىڭ مەملەكەتتىك ءرامىزدى ورنالاستىرۋ ءتارتىبى مەن ونى پايدالانۋعا قويىلاتىن تالاپتار ايقىندالعان.
قاۋلىعا سايكەس، مەملەكەتتىك تۋدى جەكە تۇرعىن ۇيلەرگە بيىكتىگى كەمىندە 3 مەتر بولاتىن جەرگە ورناتۋعا بولادى. بۇل رەتتە تاۋلىكتىڭ قاراڭعى ۋاقىتىندا تۋدى مىندەتتى تۇردە جارىقتاندىرۋ تالابى قاراستىرىلماعان.
ەرەجەگە سايكەس، مەملەكەتتىك تۋ جەرگە، ەدەنگە، سۋعا نەمەسە باسقا دا بەتتەرگە ءتيىپ تۇرماۋى ءتيىس. ال تىك ورنالاستىرىلعان جاعدايدا ۇلتتىق ويۋ-ورنەك ماتانىڭ جوعارعى بولىگىندە ورنالاسۋى قاجەت. سونىمەن قاتار، زاڭناما تالاپتارى ساقتالعان جاعدايدا مەملەكەتتىك تۋدى جەكە جانە زاڭدى تۇلعالاردىڭ اۆتوكولىك سالوندارىندا پايدالانۋعا رۇقسات بەرىلەدى.
قۇجاتتا مادەني، سپورتتىق، قوعامدىق جانە وزگە دە ءىس-شارالار بارىسىندا مەملەكەتتىك تۋدى كوممەرتسيالىق ماقساتتا پايدالانۋعا تىيىم سالىناتىنى كورسەتىلگەن. سونداي-اق مەملەكەتتىك ءرامىز ءاردايىم تازا، ءبۇتىن، كىرلەمەگەن، جىرتىلماعان جانە ەشقانداي اقاۋسىز بولۋى ءتيىس.
بۇدان بولەك، مەملەكەتتىك تۋدى قورلاۋعا نەمەسە ونىڭ قادىر-قاسيەتىن تومەندەتۋگە باعىتتالعان كەز كەلگەن ارەكەتكە جول بەرىلمەيدى. اتاپ ايتقاندا، ونى قاساقانا بۇلدىرۋگە، ورتەۋگە، جىرتۋعا، جەرگە تاستاۋعا، جويۋعا نەمەسە ماقساتىنا ساي ەمەس تۇردە پايدالانۋعا تىيىم سالىنادى.
سونداي-اق مەملەكەتتىك تۋدى جارنامادا، كيىم-كەشەككە، توسەك-ورىن جابدىقتارىنا، پەردەلەرگە، داستارحاندارعا، كىلەمشەلەرگە جانە باسقا دا تۇرمىستىق جابىندارعا قولدانۋعا رۇقسات ەتىلمەيدى.
