Qazaqstan Ükımetı Memlekettık tudy paidalanu şarttaryn bekıttı, dep habarlaidy "Adyrna" ūlttyq portaly.
Qūjatta azamattardyŋ memlekettık rämızdı ornalastyru tärtıbı men ony paidalanuǧa qoiylatyn talaptar aiqyndalǧan.
Qaulyǧa säikes, Memlekettık tudy jeke tūrǧyn üilerge biıktıgı kemınde 3 metr bolatyn jerge ornatuǧa bolady. Būl rette täulıktıŋ qaraŋǧy uaqytynda tudy mındettı türde jaryqtandyru talaby qarastyrylmaǧan.
Erejege säikes, Memlekettık Tu jerge, edenge, suǧa nemese basqa da betterge tiıp tūrmauy tiıs. Al tık ornalastyrylǧan jaǧdaida ūlttyq oiu-örnek matanyŋ joǧarǧy bölıgınde ornalasuy qajet. Sonymen qatar, zaŋnama talaptary saqtalǧan jaǧdaida Memlekettık tudy jeke jäne zaŋdy tūlǧalardyŋ avtokölık salondarynda paidalanuǧa rūqsat berıledı.
Qūjatta mädeni, sporttyq, qoǧamdyq jäne özge de ıs-şaralar barysynda Memlekettık tudy kommersiialyq maqsatta paidalanuǧa tyiym salynatyny körsetılgen. Sondai-aq memlekettık rämız ärdaiym taza, bütın, kırlemegen, jyrtylmaǧan jäne eşqandai aqausyz boluy tiıs.
Būdan bölek, Memlekettık tudy qorlauǧa nemese onyŋ qadır-qasietın tömendetuge baǧyttalǧan kez kelgen äreketke jol berılmeidı. Atap aitqanda, ony qasaqana büldıruge, örteuge, jyrtuǧa, jerge tastauǧa, joiuǧa nemese maqsatyna sai emes türde paidalanuǧa tyiym salynady.
Sondai-aq Memlekettık tudy jarnamada, kiım-keşekke, tösek-oryn jabdyqtaryna, perdelerge, dastarhandarǧa, kılemşelerge jäne basqa da tūrmystyq jabyndarǧa qoldanuǧa rūqsat etılmeidı.
