جوعارى اۋديتورلىق پالاتا جىلدىڭ ەكىنشى جارتىسىندا «قازاۆتوجول» ۇلتتىق كومپانياسى مەن «جاسىل دامۋ» اق قىزمەتىنە مەملەكەتتىك اۋديت جۇرگىزەدى، دەپ حابارلايدى “ادىرنا” ءتىلشىسى.
بۇل تۋرالى اقوردانىڭ ءباسپاسوز قىزمەتى حابارلادى.
اۋديت گاز سالاسىن، ينۆەستيتسيالىق جوبالاردى، جەكەلەگەن ۇلتتىق جوبالاردى، ونىڭ ىشىندە «اۋىل – ەل بەسىگى» جوباسىن قامتيدى.
بۇدان بولەك، شىمكەنت قالاسىنا، قاراعاندى جانە شىعىس قازاقستان وبلىستارىنا، فارماتسەۆتيكالىق ءونىم وندىرۋشىلەردى مەملەكەتتىك قولداۋ تەتىكتەرىنە تەكسەرۋ جۇرگىزۋ جوسپارلانعان.
جوعارى اۋديتورلىق پالاتانىڭ توراعاسى ءاليحان سمايىلوۆتىڭ ايتۋىنشا، جىل باسىنان بەرى جالپى قۇنى 5,8 ترلن تەڭگەنى قامتيتىن 13 ءىرى مەملەكەتتىك اۋديت اياقتالعان. ونىڭ اياسىندا بىرقاتار وڭىرلەردىڭ جەرگىلىكتى اتقارۋشى ورگاندارىنىڭ، «پروبلەمالىق كرەديتتەر قورى»، «اگرارلىق نەسيە كورپوراتسياسى»، «قازپوشتا» اق جانە «اقتاۋ تەڭىز ساۋدا پورتى» اق قىزمەتى تەكسەرىلگەن.
اۋديت ناتيجەسىندە انىقتالعان قارجىلىق جانە راسىمدىك بۇزۋشىلىقتار بويىنشا مەملەكەت بيۋدجەتىنە 128 ملرد تەڭگە قايتارىلعان.
ءاليحان سمايىلوۆتىڭ مالىمەتىنشە، جىل سوڭىنا دەيىن تاعى 20 مەملەكەتتىك ءاۋديتتى اياقتاۋ كوزدەلىپ وتىر. سونداي-اق جاڭا بيۋدجەت كودەكسىنە سايكەس 2027–2029 جىلدارعا ارنالعان رەسپۋبليكالىق بيۋدجەت جوباسىنا باعالاۋ جۇرگىزىلەدى.
