قىرعىزستاننىڭ مينيسترلەر كابينەتى جانار-جاعارماي ماتەريالدارى باعاسىن مەملەكەتتىك رەتتەۋ شارالارىنا قاتىستى شەشىمدەرگە وزگەرىستەر ەنگىزدى. بۇل تۋرالى Economist.kg جازدى، دەپ حابارلايدى «ادىرنا» ءتىلشىسى.
جاڭا قاۋلىعا سايكەس، اي-95 ماركالى بەنزين باعاسىنا ۋاقىتشا مەملەكەتتىك رەتتەۋ ەنگىزىلۋى مۇمكىن الەۋمەتتىك ماڭىزى بار تاۋارلار تىزىمىنەن شىعارىلدى.
سونىمەن قاتار 2026 جىلدىڭ 25 مامىرىنداعى جانار-جاعارماي باعاسىن تۇراقتاندىرۋ تۋرالى قاۋلىدان وتىنعا شەكتى بولشەك ساۋدا باعاسىن بەلگىلەۋدى كوزدەيتىن نورما الىنىپ تاستالدى.
قۇجات رەسمي جاريالانعان كۇننەن باستاپ، ياعني 7 شىلدەدە كۇشىنە ەندى.
ەسكە سالايىق، 25 مامىردا قىرعىزستان بيلىگى مۇناي ونىمدەرىن جەتكىزۋشىلەردى سۋبسيديالاۋ تەتىگىن جانە وتىن باعاسىن ۋاقىتشا مەملەكەتتىك رەتتەۋ شارالارىن ەنگىزگەن بولاتىن.
بۇعان دەيىن قازاقستاننىڭ ەنەرگەتيكا ۆيتسە-ءمينيسترى قايىرحان تۇتقىشباەۆ قىرعىزستان تاراپى قازاقستانعا بەنزين جەتكىزۋدى قامتاماسىز ەتۋ تۋرالى رەسمي ءوتىنىش جولداعانىن مالىمدەگەن ەدى. قازىرگى ۋاقىتتا بۇل ماسەلە مينيسترلىك تاراپىنان قاراستىرىلىپ جاتىر.
بۇگىندە ورتالىق ازيا ەلدەرىندە بەنزين تاپشىلىعى بايقالۋدا. بۇعان رەسەيدەگى جانارماي داعدارىسى سەبەپ بولىپ وتىر. داعدارىس ۋكراينالىق درونداردىڭ شابۋىلىنان كەيىن بىرقاتار ءىرى مۇناي وڭدەۋ زاۋىتىنىڭ جۇمىسىن توقتاتۋىنان تۋىنداعان. سونىڭ سالدارىنان رەسەيدە جانارماي باعاسى قىمباتتاپ، جانارماي قۇيۋ بەكەتتەرىندە كەزەكتەر كوبەيگەن.
بۇل جاعدايدى رەتتەۋ ءۇشىن رەسەي بيلىگى ىشكى نارىققا ارنالعان بەنزين مەن ديزەل وتىنىنىڭ ساپاسىنا قويىلاتىن تالاپتاردى ۋاقىتشا تومەندەتۋگە رۇقسات بەرىپ، بەنزيندى تەڭىز جولىمەن يمپورتتاۋ مۇمكىندىگىن قاراستىرىپ جاتىر.
