قىرعىزستاننىڭ باتكەن وبلىسىنداعى ەكى باقىلاۋ-وتكىزۋ بەكەتىندە سىبايلاس جەمقورلىققا قارسى ارنايى وپەراتسيا جۇرگىزىلدى، دەپ حابارلايدى “ادىرنا” ءتىلشىسى.
24.kg دەرەگىنشە، 27 اسكەري قىزمەتكەر ۇستالدى. وپەراتسيا 5 شىلدە كۇنى كەشكە وزبەكستانمەن شەكاراداعى «قادامجاي-اۆتوجول» جانە «چەچمە-اۆتوجول» باقىلاۋ-وتكىزۋ بەكەتتەرىندە ءبىر مەزگىلدە وتكەن. وعان قىرعىزستاننىڭ ۇلتتىق قاۋىپسىزدىك مەملەكەتتىك كوميتەتىنىڭ قىزمەتكەرلەرى مەن «الفا» ارنايى جاساعى قاتىسقان.
الدىن الا اقپارات بويىنشا، ارنايى جاساق شەكارا قىزمەتى، كەدەن جانە ۆەتەرينارلىق باقىلاۋ قىزمەتىنىڭ قىزمەتكەرلەرىن ۇستاعان. وپەراتسيا بارىسىندا اتىس تا بولعان. مالىمەتكە سايكەس، «قادامجاي» بەكەتىندە كەزەكشىلىك اتقارعان پراپورششيك ارنايى جاساق اۋماققا كىرگەن كەزدە ءتورت رەت وق اتقان، ال تاعى ءبىر اسكەري قىزمەتكەر ەسكەرتۋ رەتىندە اۋاعا وق شىعارعان. قارۋ قولدانۋ زاڭدىلىعى تەكسەرىلىپ جاتىر.
ءتىنتۋ بارىسىندا شەكاراشىلاردان 38,5 مىڭ قىرعىز سومى مەن 5,6 ميلليوننان استام وزبەك سومى تاركىلەنگەن. سونداي-اق كەدەن قىزمەتكەرلەرىنەن 100 مىڭ قىرعىز سومى جانە اقش دوللارى الىنعان. تەرگەۋ ولاردىڭ ناقتى كولەمىن انىقتاپ جاتىر.
بۇدان بولەك، «چەچمە» باقىلاۋ-وتكىزۋ بەكەتىنىڭ ەكى قىزمەتكەرى اقشا الۋ ساتىندە بەينەباقىلاۋ كامەرالارىنا ءتۇسىپ قالعانى حابارلاندى.
رەسمي مالىمەت بويىنشا، ۇقك باسقارماسىنا «چەچمە» بەكەتىنەن 11, ال «قادامجاي» بەكەتىنەن 16 اسكەري قىزمەتكەر جەتكىزىلگەن. سونداي-اق ەكى اك-74 اۆتوماتى، ەكى وقجاتار جانە 60 پاترون تاركىلەندى.
تەرگەۋ امالدارىنا بايلانىستى ەكى باقىلاۋ-وتكىزۋ بەكەتىنىڭ جۇمىسى ۋاقىتشا توقتاتىلدى. سونىڭ سالدارىنان شەكارادا شامامەن 3 مىڭ ادام مەن 400 اۆتوكولىك كەپتەلىستە قالعان. كەيىن «قادامجاي» بەكەتى ارقىلى قوزعالىس قايتا قالپىنا كەلتىرىلدى.
