قىرعىزستاندا «ازاتتىق» راديوسىنىڭ سايتى بۇعاتتالىپ ، وپپوزيتسيا وكىلدەرى قاماۋعا الىندى، دەپ حابارلايدى “ادىرنا” ۇلتتىق پورتالى ۆۆس باسىلىمىنا سىلتەپ.
وعان سەبەپ – قىرعىزستان مەن ونىڭ كورشىلەرى اراسىنداعى شەشىلمەگەن اۋماقتىق داۋلار، ولاردىڭ جاريالانۋى، سىنى مەن نارازىلىعى ەكەن.
قىرعىزستاننىڭ مادەنيەت، اقپارات، سپورت جانە جاستار ساياساتى مينيسترلىگى «ازاتتىق-ەۋروپا» راديوسىنىڭ قىرعىزشا سايتى ازاتتىك-مەديانى «قىرعىزستاننىڭ ۇلتتىق مۇددەلەرىنە قايشى كەلەتىن ماتەريالدار بار» دەگەن نەگىزبەن ەكى ايعا بۇعاتتاۋ تۋرالى شەشىم قابىلدادى.
مينيسترلىكتىڭ اقپاراتتىق ساياسات باسقارماسىنىڭ باسشىسى سالقىن سارنوگوەۆانىڭ ايتۋىنشا، مينيسترلىك «قىرعىزستان مەن تاجىكستان شەكاراسىنداعى اۋىر شايقاس» سيۋجەتىندە جالعان اقپارات بار دەپ ازاتتىق-مەدياعا حات جولداعان. جاۋاپ رەتىندە، رەداكتورلار ونى الىپ تاستايتىندارىن ايتقان، بىراق ەشقاشان وشىرمەگەن.
«ازات ەۋروپا/ازاتتىق» راديوسىنىڭ پرەزيدەنتى دجەيمي فلاي داۋلى ماتەريالدىڭ بارلىق حالىقارالىق جۋرناليستيكا ستاندارتتارىنا ساي كەلەتىنى تۋرالى مالىمدەمە جاساپ، بۇعاتتاۋعا جاۋاپ بەردى.
«جۋرناليستەرگە قارسى قوقان-لوققىلار مەن تاۋەلسىز باق-تىڭ اۋزىن جابۋ ارەكەتى – قىرعىزستانداعى دەموكراتياعا نۇقسان كەلتىرەتىن اۆتوريتارلىق تاكتيكا»، - دەدى فلاي.
Human Rights Watch حالىقارالىق ۇيىمى قىرعىز بيلىگىنىڭ ازاتتىق-مەديا سايتىنا توسقاۋىل قويۋىن سىنادى. ۇيىمنىڭ ورتالىق ازياداعى زەرتتەۋشىسى سىينات سۇلتاناليەۆا قىرعىزستان تاۋەلسىز باق-تى قىسپاستان، قولداۋى كەرەك ەكەنىن اتاپ ءوتتى.
"قاقتىعىستىڭ ەكى جاعىنا دا داۋىس بەرۋ - ستاندارتتى جۋرناليستىك تاجىريبە. وسى نەگىزدە ازاتتىقتى بۇعاتتاۋ قىرعىزستانداعى تسەنزۋرانىڭ جانە ەركىن جۋرناليستيكاعا باقىلاۋدىڭ كۇشەيگەنىنىڭ بەلگىسى", - دەدى ول.
ازاتتىقپەن ىنتىماقتاستىعىن اقش مەملەكەتتىك دەپارتامەنتى، ەو وكىلدىگى جانە Internews حالىقارالىق جۋرناليستىك ۇيىمى ءبىلدىردى. سوڭعى ۋاقىتقا دەيىن قىرعىزستان ءسوز بوستاندىعى رەيتينگى بويىنشا ورتالىق ازياداعى ەڭ جوعارى ورىنعا يە بولدى جانە پىكىر پليۋراليزمىمەن ەرەكشەلەندى.
2022 جىلى قىرعىزستان ءسوز بوستاندىعى بويىنشا الەمدىك رەيتينگتە جەتى ساتىعا كوتەرىلىپ، 72-ورىنعا يە بولدى. سالىستىرۋ ءۇشىن قازاقستان 122, ال رەسەي 155-ورىنعا تۇراقتادى.
ايتا كەتەيىك، 28 قازان كۇنى تاڭەرتەڭ قىرعىزستاننىڭ تاۋەلسىز بۇقارالىق اقپارات قۇرالدارى ازاتتىقپەن ىنتىماقتاسا وتىرىپ، بىرلەسكەن اكتسيا وتكىزدى: جەرگىلىكتى ۋاقىت بويىنشا ساعات 9.00-دەن 12.00-گە دەيىن ولار جاڭالىقتار جاريالامادى. ال مەملەكەتتىك ورگانداردىڭ جاڭالىقتارى كۇنى بويى جاريالانبادى.
سونداي-اق، سايت جابىلار الدىندا وش وبلىسىنداعى كەمپىر-اباد سۋ قويماسىن وزبەكستانمەن باسقا داۋلى ايماقتارعا ايىرباستاۋ تۋرالى ۇكىمەتتىڭ شەشىمىن سىناعان 20-دان استام وپپوزيتسيونەر مەن بەلسەندى ۇستالدى.
سوت "جاپپاي تارتىپسىزدىكتەر ۇيىمداستىرۋعا دايىندالدى" دەگەن ايىپپەن ۇستالعانداردىڭ كوپشىلىگى ەكى ايعا قاماۋعا الىنادى دەپ شەشتى. جالعىز ەرەكشەلىك بەلسەندى تالانت ەشاليەۆ بولدى، ول دەنساۋلىعىنا بايلانىستى ۇيقاماققا الىندى. ايىپتالۋشىلار ءوز كىنالارىن مويىنداماي، تەرگەۋ بارىسىندا ولارعا جاسالعان قىسىم تۋرالى ايتىپ وتىر.
