مەملەكەت باسشىسىنىڭ ۆەتەريناريالىق قاۋىپسىزدىكتى نىعايتۋ جانە اگروونەركاسىپ كەشەنىن دامىتۋ جونىندەگى تاپسىرمالارىن ىسكە اسىرۋ اياسىندا ۇلىتاۋ وبلىسىندا ۆەتەريناريالىق ينفراقۇرىلىمدى جاڭعىرتۋ باعىتىنداعى جۇمىستار ناتيجەلى جۇزەگە اسىرىلۋدا.
ۆەتەريناريالىق قىزمەتتىڭ تيىمدىلىگىن ارتتىرۋ، اۋىلدىق ەلدى مەكەندەردى زاماناۋي ينفراقۇرىلىممەن قامتاماسىز ەتۋ جانە جانۋارلار اۋرۋلارىنىڭ الدىن الۋ ماقساتىندا رەسپۋبليكالىق بيۋدجەتتەن بولىنگەن جالپى سيپاتتاعى ترانسفەرتتەر ەسەبىنەن وڭىردە اۋقىمدى قۇرىلىس جۇمىستارى جۇرگىزىلۋدە.
جۇرگىزىلگەن قاجەتتىلىك تالداۋىنىڭ ناتيجەسىندە ۇلىتاۋ وبلىسىندا 2026–2027 جىلدارى جالپى سانى 53 ۆەتەريناريالىق نىسان سالۋ كوزدەلدى. اتالعان جوبالاردى ىسكە اسىرۋعا ۇكىمەت تاراپىنان 1,4 ملرد تەڭگە ءبولىندى. ونىڭ ىشىندە بيىل 570 ملن تەڭگە قاراجاتقا 22 ۆەتەريناريالىق نىساننىڭ، ال 2027 جىلى 836,5 ملن تەڭگەگە 31 نىساننىڭ قۇرىلىسى جوسپارلانعان.
بۇگىنگى تاڭدا 2026 جىلعا جوسپارلانعان بارلىق 22 مودۋلدىك ۆەتەريناريالىق نىساننىڭ قۇرىلىسى تولىق اياقتالىپ، پايدالانۋعا بەرىلدى. وسىلايشا، ۇلىتاۋ وبلىسى ۆەتەريناريالىق ينفراقۇرىلىمدى دامىتۋ جونىندەگى بيىلعى جوسپاردى ەلىمىزدە العاش بولىپ تولىق ورىنداعان ءوڭىر اتاندى. بارلىق نىساندار مەملەكەتتىك ۆەتەريناريالىق ۇيىمداردىڭ تەڭگەرىمىنە بەرىلىپ، تۇرعىندارعا ۆەتەريناريالىق قىزمەت كورسەتۋدە پايدالانىلۋدا.
جاڭا ۆەتەريناريالىق نىسانداردىڭ پايدالانۋعا بەرىلۋى وڭىردەگى مەملەكەتتىك ۆەتەريناريالىق قىزمەتتىڭ ماتەريالدىق-تەحنيكالىق الەۋەتىن ايتارلىقتاي كۇشەيتتى. عيماراتتار قاجەتتى ينجەنەرلىك كوممۋنيكاتسيالارمەن تولىق قامتاماسىز ەتىلىپ، ۆەتەريناريالىق-سانيتاريالىق تالاپتارعا ساي جابدىقتالعان.
ءاربىر نىساندا مامانداردىڭ ساپالى جۇمىس ىستەۋىنە ارنالعان قىزمەتتىك كابينەتتەر، ۆەتەريناريالىق پرەپاراتتاردى ساقتاۋعا ارنالعان ارنايى بولمەلەر، جانۋارلاردى قاۋىپسىز بەكىتۋگە ارنالعان ارنايى قوندىرعىلار جانە ۆەتەريناريالىق ءىس-شارالاردى جۇرگىزۋگە قاجەتتى جابدىقتار قاراستىرىلعان.
بۇل ءوز كەزەگىندە پروفيلاكتيكالىق ۆاكتسيناتسيانى، دياگنوستيكالىق زەرتتەۋلەردى، جانۋارلاردى بىردەيلەندىرۋ جۇمىستارىن جانە ەپيزووتياعا قارسى ءىس-شارالاردى ۋاقتىلى ءارى ساپالى جۇرگىزۋگە مۇمكىندىك بەرەدى. سونىمەن قاتار، شالعاي اۋىلدىق ەلدى مەكەندەر تۇرعىندارى ءۇشىن ۆەتەريناريالىق قىزمەتتىڭ قولجەتىمدىلىگى ارتىپ، كورسەتىلەتىن قىزمەتتەردىڭ ساپاسى جاڭا دەڭگەيگە كوتەرىلۋدە.
سالىنعان ۆەتەريناريالىق بەكەتتەر دۇنيەجۇزىلىك جانۋارلار دەنساۋلىعى ۇيىمىنىڭ (WOAH) حالىقارالىق تالاپتارىنا سايكەس كەلەدى. بۇل وڭىردەگى بيولوگيالىق قاۋىپسىزدىكتى نىعايتۋعا، اسا قاۋىپتى جانۋارلار اۋرۋلارىنىڭ تارالۋىنىڭ الدىن الۋعا، قولايلى ەپيزووتيالىق احۋالدى ساقتاۋعا جانە ازىق-تۇلىك قاۋىپسىزدىگىن قامتاماسىز ەتۋگە مۇمكىندىك بەرەدى.
ۆەتەريناريالىق ينفراقۇرىلىمدى جۇيەلى دامىتۋ – اۋىل شارۋاشىلىعى سالاسىنىڭ تۇراقتى دامۋىنىڭ، حالىقتىڭ ءال-اۋقاتىن ارتتىرۋدىڭ جانە ەلىمىزدىڭ ۆەتەريناريالىق قاۋىپسىزدىگىن قامتاماسىز ەتۋدىڭ ماڭىزدى تەتىكتەرىنىڭ ءبىرى. وسى باعىتتاعى جۇمىستار ۇلىتاۋ وبلىسىندا الداعى كەزەڭدە دە كەزەڭ-كەزەڭىمەن جالعاساتىن بولادى.
