سىرتقى ىستەر مينيسترلىگى قازاقستان اۋماعىنان ۇشقىشسىز ۇشۋ اپپاراتتارى ىسكە قوسىلعانى تۋرالى اقپاراتتى جوققا شىعاردى، دەپ حابارلايدى «ادىرنا» ءتىلشىسى.
«سوڭعى ۋاقىتتا كەيبىر باق-تا رەسەي فەدەراتسياسى اۋماعىنداعى وبەكتىلەرگە شابۋىل جاساۋ كەزىندە قولدانىلعان ۇشقىشسىز ۇشاتىن اپپاراتتاردى ۇشىرۋ ءۇشىن قازاقستان رەسپۋبليكاسىنىڭ اۋماعى پايدالانىلۋى مۇمكىن دەگەن ارانداتۋشىلىق مالىمدەمەلەر تاراتىلۋدا. سىرتقى ىستەر مينيسترلىگى اتالعان مالىمدەمەلەردىڭ شىندىققا سايكەس كەلمەيتىنىن جانە ەشقانداي دەرەكپەن نە فاكتىمەن راستالمايتىنىن رەسمي تۇردە مالىمدەيدى»،—دەلىنگەن حابارلامادا.
مينيسترلىك مۇنداي جاريالانىمداردى ەكى ەل اراسىنداعى ءداستۇرلى دوستىق قارىم-قاتىناستىڭ سيپاتىن بۇرمالاۋعا باعىتتالعان نەگىزسىز الىپقاشپا پىكىرلەر دەپ اتادى.
«قازاقستان ءوز اۋماعىنىڭ، اۋە كەڭىستىگىنىڭ جانە ينفراقۇرىلىمىنىڭ باسقا مەملەكەتتەرگە قارسى باعىتتالعان ارەكەتتەردى جۇزەگە اسىرۋ ءۇشىن پايدالانىلۋىنا جول بەرمەيدى. وسىعان بايلانىستى باق وكىلدەرى مەن وزگە دە تۇلعالاردى تەك تەكسەرىلگەن دەرەكتەرگە سۇيەنۋگە جانە جالعان اقپارات تاراتۋدان باس تارتۋعا شاقىرامىز»، – دەلىنگەن تۇسىنىكتەمەدە.
