ەلىمىزدە بوسقىن مارتەبەسىن بەرۋ ءتارتىبى جاڭارتىلدى, دەپ حابارلايدى «ادىرنا» ءتىلشىسى.
ءتيىستى وزگەرىستەر ەڭبەك جانە حالىقتى الەۋمەتتىك قورعاۋ ءمينيسترى اسقار ەرتاەۆتىڭ 2026 جىلدىڭ 30 ماۋسىمىنداعى بۇيرىعىمەن ەنگىزىلگەن. قۇجاتقا سايكەس، ناسىلىنە، ۇلتىنا، دىنىنە، ازاماتتىعىنا، بەلگىلى ءبىر الەۋمەتتىك توپقا قاتىستىلىعىنا نەمەسە ساياسي كوزقاراسىنا بايلانىستى قۋدالاۋعا ۇشىراۋ قاۋپى بار شەتەلدىك نەمەسە ازاماتتىعى جوق ادام بوسقىن دەپ تانىلادى.
بوسقىن مارتەبەسىن الۋ ءۇشىن حالىقتى جۇمىسپەن قامتۋ ماسەلەلەرى جونىندەگى جەرگىلىكتى اتقارۋشى ورگاندارعا جازباشا ءوتىنىش بەرۋ كەرەك. ءوتىنىش قازاقستانعا كەلگەن كۇننەن باستاپ نەمەسە قۋدالاۋ قاۋپى تۋىنداعانىن بىلگەن ساتتەن باستاپ بەس كۇنتىزبەلىك كۇن ىشىندە تاپسىرىلۋى قاجەت.
سونداي-اق باسپانا ىزدەۋشى كۋالىگىن بەرۋ ءتارتىبى ناقتىلاندى. بۇل قۇجات 18 جاسقا تولعان شەتەل ازاماتتارى مەن ازاماتتىعى جوق ادامدارعا ءۇش اي مەرزىمگە بەرىلەدى. ول بوسقىن مارتەبەسىن بەرۋ ماسەلەسى قارالىپ جاتقان كەزەڭدە قازاقستان اۋماعىندا زاڭدى تۇردە بولۋعا قۇقىق بەرەدى.
ەگەر ءوتىنىش وتباسى مۇشەلەرىمەن قاۋىشۋ ماقساتىندا بەرىلسە، تۋىستىق بايلانىستى راستايتىن قۇجاتتاردى ۇسىنۋ قاجەت.
وزگەرىستەر 2026 جىلعى 18 شىلدەدەن باستاپ كۇشىنە ەنبەك.
