قارجى مينيسترلىگىنىڭ مەملەكەتتىك كىرىستەر كوميتەتى نۇرلان سابۋروۆتىڭ سالىق مىندەتتەمەلەرىن ورىنداۋىنا قاتىستى اقپارات جاريالادى، دەپ حابارلايدى “ادىرنا” ءتىلشىسى.
ۆەدومستۆو مالىمەتىنشە، نۇرلان سابۋروۆ 2023 جىلعى 21 ناۋرىزدا قازاقستاندا جەكە كاسىپكەر رەتىندە تىركەلگەن. ونىڭ قىزمەت ءتۇرى – كونتسەرتتىك قىزمەت.
مكك دەرەگىنە سايكەس، ازىلكەش جەكە كاسىپكەر رەتىندە سالىق مىندەتتەمەلەرىن 2024 جىلدان بەرى ورىنداپ كەلەدى. قازىر ونىڭ قازاقستانداعى سالىق بويىنشا بەرەشەگى جوق.
كوميتەتتىڭ حابارلاۋىنشا، نۇرلان سابۋروۆقا قاتىستى سالىقتىق اكىمشىلەندىرۋدىڭ جالپى ءتارتىبى قولدانىلادى. ەگەر كامەرالدىق باقىلاۋ بارىسىندا سايكەسسىزدىكتەر انىقتالسا، سالىق كودەكسىنە سايكەس ءتيىستى شارالار قابىلدانادى.
سونداي-اق مكك ۇزاق ۋاقىت ەلدەن تىس جۇرگەن كاسىپكەرلەرگە قاتىستى تۇسىنىكتەمە بەردى. ەگەر جەكە كاسىپكەرلىك قىزمەتى رەسمي تۇردە توقتاتىلماعان بولسا، قايتا تىركەلۋدىڭ قاجەتى جوق، تەك قاجەت بولعان جاعدايدا تىركەۋ دەرەكتەرىن جاڭارتۋ جەتكىلىكتى. ال قىزمەتى توقتاتىلعان جاعدايدا كاسىپكەرلىكتى قايتا تىركەۋ تالاپ ەتىلەدى.
بۇعان قوسا، كوميتەت تابىس پەن مۇلىك تۋرالى دەكلاراتسيا تاپسىرۋ ءتارتىبىن دە ەسكە سالدى. سالىق كودەكسىندە كوزدەلگەن تالاپتارعا سايكەس ازاماتتار بەلگىلەنگەن مەرزىمدە ءتيىستى دەكلاراتسيانى ۇسىنۋعا مىندەتتى.
ەسكە سالايىق، بيىل اقپاندا رەسەي بيلىگى نۇرلان سابۋروۆتىڭ ەلگە كىرۋىنە 50 جىلعا تىيىم سالعان.
