Oبلىس اكىمى ناريمان تورەعاليەۆتىڭ قاتىسۋىمەن «قازاقستاننىڭ ۇزدىك تاۋارى – 2026» وڭىرلىك كورمە-بايقاۋى ءوتتى. ماقسات – جەرگىلىكتى تاۋار وندىرۋشىلەردى قولداۋ، ءونىم ساپاسىن ارتتىرۋ. بيىلعى باسەكەدە 42 كاسىپورىن 3 اتالىم بويىنشا باق سىنادى.
20 جىلعا جۋىق ۋاقىت ىشىندە بايقاۋ وتاندىق وندىرۋشىلەردى ىنتالاندىرىپ، ءىسىن ىلگەرىلەتۋگە تىڭ سەرپىن بەرىپ كەلەدى. بۇل جولى دا كورمەگە جەرگىلىكتى كاسىپورىنداردىڭ تاماق ونىمدەرى، كۇردەلى ونەركاسىپتىك جانە تۇرمىستىق قۇرال-جابدىقتار قويىلدى.
سالتاناتتى ءىس-شارادا ءسوز العان ايماق باسشىسى باسەكەگە قابىلەتتى ءونىم شىعارىپ، ساپالى قىزمەت كورسەتۋ ەلىمىزدىڭ وركەندەۋىنە ناقتى ىسپەن ۇلەس قوسۋ ەكەنىن اتاپ ءوتتى.
- مىقتى ءارى باسەكەگە قابىلەتتى بيزنەس – مەملەكەتتىڭ باستى تىرەگى. ءوڭىرىمىز ونەركاسىپ ءونىمىن ءوندىرۋ كولەمى جاعىنان ەلىمىزدە ءتورتىنشى ورىندى يەلەنىپ وتىر. 2026 جىلدىڭ العاشقى 5 ايىندا ونەركاسىپ كولەمى 1,7 تريلليون تەڭگەگە جەتسە، ونىڭ ىشىندە وڭدەۋ ونەركاسىبى تۇراقتى ءوسىم كورسەتتى. جالپى، ايماققا تارتىلعان ينۆەستيتسيانىڭ 49%-ى ءدال وسى ونەركاسىپ سالاسىنا باعىتتالعان. پرەزيدەنت تاپسىرمالارى اياسىندا بيزنەسكە قولايلى جاعداي جاساۋ، جەرگىلىكتى تاۋار وندىرۋشىلەردى قولداۋ شارالارى جۇيەلى جالعاسا بەرەدى، — دەدى ناريمان تورەعاليەۆ.
بايقاۋ قورىتىندىسىندا «وندىرىستىك ماقساتتاعى ۇزدىك تاۋارلار» اتالىمى بويىنشا «باتىس قازاقستان ماشينا جاساۋ كومپانياسى» اق، «كوندەنسات» اق جانە «QazExpoCentre-Pipe» جشس، «حالىق تۇتىناتىن ۇزدىك تاۋارلار» اتالىمى بويىنشا «مەكو» جك، «وقجەتپەس life» قب، «يمار» جك، «ۇزدىك ازىق-تۇلىك تاۋارلارى» اتالىمى بويىنشا «جەلاەۆ استىق ونىمدەرى كومبيناتى» اق، «قاز-اقباس» جشس، «ماكانوۆا» جك ۇزدىك دەپ تانىلىپ، قارجىلاي سىيلىققا يە بولدى.
ايتا كەتەيىك، جەڭىمپازدار كۇزدە استانا قالاسىندا وتەتىن رەسپۋبليكالىق كەزەڭدە باق سىنايدى.
