الماتى اكىمى دارحان ساتىبالدى ناۋرىزباي اۋدانى تۇرعىندارىن ساپالى اۋىز سۋمەن قامتاماسىز ەتۋ ماقساتىندا سالىنعان اقساي وزەنىندەگى سۇزگى ستانتسياسى بار جاڭا سۋ تارتۋ نىسانىنىڭ سالتاناتتى ىسكە قوسىلۋ راسىمىنە قاتىستى.
قالانىڭ ەنەرگەتيكا جانە سۋمەن جابدىقتاۋ باسقارماسى وكىلدەرىنىڭ مالىمەتىنشە، جاڭا نىسان قالانىڭ ينجەنەرلىك ينفراقۇرىلىمىن دامىتۋعا باعىتتالعان نەگىزگى جوبالاردىڭ ءبىرى. ول قارقىندى دامىپ كەلە جاتقان تۇرعىن الاپتاردى سۋمەن جابدىقتاۋ جۇيەسىنىڭ سەنىمدىلىگىن ەداۋىر ارتتىرۋعا مۇمكىندىك بەرەدى. نىساننىڭ تاۋلىكتىك ونىمدىلىگى – 22 مىڭ تەكشە مەتر سۋ.
جوبا اياسىندا سۋ تارتۋ قۇرىلىسى مەن زاماناۋي سۋ دايىنداۋ كەشەنى سالىندى. نىساننىڭ جەلىلىك بولىگىنىڭ جالپى ۇزىندىعى 7 شاقىرىم بولسا، ونىڭ 5,9 شاقىرىمى ماگيسترالدىق سۋ قۇبىرىنا تيەسىلى. سونىمەن قاتار اۆتوكولىك كوپىرلەرى، سەل وتكىزگىش قۇرىلىستار، اكۆەدۋكتەر، تىرەۋ قابىرعالارى مەن كىرمە جولدار بوي كوتەرىپ، جول بەلگىلەرى مەن قورعانىس قورشاۋلارى ورناتىلدى.
ستانتسيادا سۋدى تازارتۋدىڭ تولىق زاماناۋي تسيكلى ەنگىزىلگەن. مۇندا راديالدى تۇندىرعىشتار، قۇيىندى ارالاستىرعىشتار، كۆارتس قۇمى قولدانىلاتىن جەدەل سۇزگىلەر، ەلەكتروليز جانە رەاگەنتتىك بلوكتار، سونداي-اق سۋدى زالالسىزداندىرۋ جانە سۋسىزداندىرۋ جۇيەلەرى سالىندى. تازارتىلعان سۋدى ساقتاۋ ءۇشىن جالپى سىيىمدىلىعى 10 مىڭ تەكشە مەتر بولاتىن ەكى رەزەرۆۋار قاراستىرىلعان.
بارلىق تەحنولوگيالىق ۇدەرىس تولىق اۆتوماتتاندىرىلعان. باسقارۋ بىرىڭعاي ديسپەتچەرلىك ورتالىق ارقىلى جۇزەگە اسىرىلادى. بۇل ورتالىق وزەننەن سۋ الۋدان باستاپ، ونى تازارتۋ جانە تۇتىنۋشىلارعا جەتكىزۋگە دەيىنگى بارلىق كەزەڭدى تاۋلىك بويى ۇزدىكسىز باقىلاپ وتىرادى. سونداي-اق مۇندا زاماناۋي مونيتورينگ جۇيەلەرى، سۋ شىعىنىن باقىلاۋ قۇرالدارى جانە بەينەباقىلاۋ كەشەنى ورناتىلعان.
جوبانى جۇزەگە اسىرۋ ناتيجەسىندە الماتى قالاسىنىڭ ناۋرىزباي اۋدانىنداعى تاۋجولى، تاستىبۇلاق، تاۋسامالى، اقجار جانە شۇعىلا شاعىناۋداندارىنىڭ، سونداي-اق قاراساي اۋدانىنداعى جاڭاتۇرمىس جانە قىرعاۋىلدى اۋىلدارىنىڭ تۇرعىندارى تۇراقتى ءارى ساپالى اۋىز سۋمەن قامتاماسىز ەتىلەدى. جالپى قامتىلاتىن حالىق سانى 100 مىڭنان اسادى.
جاڭا ستانتسيانىڭ پايدالانۋعا بەرىلۋى الماتى قالاسىنىڭ سۋمەن جابدىقتاۋ جۇيەسىن جاڭعىرتۋداعى ماڭىزدى قادام سانالادى. بۇل جوبا اۋىز سۋدى ۇزدىكسىز ءارى سەنىمدى جەتكىزۋدى قامتاماسىز ەتىپ قانا قويماي، قالانىڭ ودان ءارى دامۋىنا قاجەتتى ينجەنەرلىك الەۋەتتى كۇشەيتىپ، تۇرعىنداردىڭ ءومىر ءسۇرۋ ساپاسىن ارتتىرۋعا ىقپال ەتەدى.
