قازاقستاننىڭ مادەنيەت قايراتكەرى، حالىق اعارتۋ ءىسىنىڭ ۇزدىگى، ەڭبەك ارداگەرى، ۇلاعاتتى ۇستاز تورتكەن كەنەنقىزىنىڭ دۇنيەدەن ءوتتى. مادەنيەت جانە اقپارات مينيسترلىگى تۋعان-تۋىستارى مەن جاقىندارىنا، بارشا شاكىرتتەرى مەن زيالى قاۋىم وكىلدەرىنە، تۋعان حالقىنا قايعىرىپ كوڭىل ايتتى، دەپ حابارلايدى “ادىرنا”.
“تورتكەن كەنەنقىزى سانالى عۇمىرىن ۇرپاق تاربيەسىنە، ۇلتتىق ونەر مەن مادەنيەتتى دامىتۋعا ارناعان تۇلعا ەدى. ول ۇزاق جىلدار بويى ءبىلىم بەرۋ سالاسىندا تاباندى ەڭبەك ەتىپ، تالاي شاكىرتتىڭ بويىنا انا ءتىلى مەن ادەبيەتكە، ۇلتتىق قۇندىلىقتارعا دەگەن سۇيىسپەنشىلىك دارىتتى. حالىق اقىنى، ءانشى-كومپوزيتور كەنەن ازىرباەۆتىڭ پەرزەنتى رەتىندە اكە اماناتىنا ەرەكشە ادالدىق تانىتتى. كەنەننىڭ ءان-جىرلارىن جيناپ، زەرتتەپ، كەيىنگى بۋىنعا جەتكىزۋگە ولشەۋسىز ۇلەس قوستى”،-دەلىنگەن حابارلامادا.
سونداي-اق وندا تورتكەن كەنەنقىزىنىڭ ونەگەلى ءومىرى، ۇستازدىق ۇلاعاتى، ونەرگە دەگەن ادالدىعى مەن ۇلتتىق رۋحانياتقا سىڭىرگەن ەڭبەگى كەيىنگى بۋىن ءۇشىن ءاردايىم ۇلگى-ونەگە بولاتىنى ايتىلعان.
“اسىلدىڭ سىنىعى بولعان ارداقتى انانىڭ عيبراتتى عۇمىرى مەن جارقىن بەينەسى حالىق جادىندا ماڭگى ساقتالادى. مارقۇمنىڭ جانى ءجانناتتان جاي تاۋىپ، يمانى سالامات، جاتقان جەرى جارىق، توپىراعى تورقا بولسىن!” -دەلىنگەن مينيسترلىك حابارلاماسىندا.
ايتا كەتسەك، بۇعان دەيىن بەلگىلى جۋرناليست، اقىن جۇمابەك تابىنباەۆتىڭ دۇنيەدەن وتكەنىن حابارلادىق.
