اتىراۋ وبلىسىندا بۇرىنعى جۇبايىنىڭ ءتورت تۋىسىن ءولتىردى دەپ ايىپتالعان ەر ادامعا قاتىستى سوت ۇكىمى شىقتى، دەپ حابارلايدى "ادىرنا" ۇلتتىق پورتالى.
قىلمىستىق ىستەر جونىندەگى مامانداندىرىلعان اۋدانارالىق سوت ونى ءومىر بويىنا باس بوستاندىعىنان ايىرۋ جازاسىنا كەستى.
سوتتىڭ مالىمەتىنشە، ايىپتالۋشى بىرنەشە قىلمىستىق قۇقىق بۇزۋشىلىق، ونىڭ ىشىندە ەكى جانە ودان دا كوپ ادامدى ءولتىرۋ، الاياقتىق، مال ۇرلاۋ جانە قۇجاتتاردى زاڭسىز يەمدەنىپ، جاسىرۋ فاكتىلەرى بويىنشا كىنالى دەپ تانىلدى. ول جازاسىن توتەنشە قاۋىپسىزدىك مەكەمەسىندە وتەيتىن بولادى.
تەرگەۋ ماتەريالدارىنا سايكەس، قىلمىس 2025 جىلى اتىراۋ وبلىسىنىڭ جانگەلدين اۋىلىندا جاسالعان. الدىمەن بۇرىنعى جۇبايىنىڭ اعاسى ءولتىرىلىپ، ءمايىتى اۋلاداعى شۇڭقىرعا جاسىرىلعان. كەيىن وتباسىلىق جانجال بارىسىندا بۇرىنعى بالدىزى دا قازا تاپقان. ال بىرنەشە ايدان سوڭ ايىپتالۋشى بۇرىنعى قايىن اتاسى مەن ەنەسىن ءولتىرىپ، ولاردىڭ مايىتتەرىن قورا اۋماعىنا كومگەن.
سوت بارىسىندا ايىپتالۋشى ارەكەتىن بۇرىنعى جۇبايىنىڭ تۋىستارىمەن اراداعى ۇزاققا سوزىلعان جانجالمەن جانە پسيحولوگيالىق قىسىممەن بايلانىستىرعان.
قىلمىستان كەيىن ول بۇرىنعى جۇبايىمەن بىرگە قازاقستاننان كەتىپ قالعان. الايدا 2026 جىلدىڭ اقپان ايىندا ەكەۋى يندونەزيانىڭ لومبوك ارالىندا ۇستالىپ، قازاقستانعا ەكستراديتسيالاندى. تەرگەۋ بارىسىندا بۇرىنعى جۇبايىنىڭ قىلمىسقا قاتىسى دالەلدەنبەگەندىكتەن، وعان قاتىستى قىلمىستىق ءىس توقتاتىلعان.
2026 جىلدىڭ 14 شىلدەسىندە سوت ايىپتالۋشىنى بارلىق ايىپتار بويىنشا كىنالى دەپ تانىپ، وعان ءومىر بويىنا باس بوستاندىعىنان ايىرۋ جازاسىن تاعايىندادى.
