The Marco Polo Project حالىقارالىق ەلەكتروموبيلدەر ەكسپەديتسياسى تاريحي ۇلى جىبەك جولى بويىمەن ساپار شەگۋدە. ۇزىندىعى شامامەن 15 مىڭ شاقىرىم بولاتىن جوبا ريم مەن گونكونگتى بايلانىستىرىپ، 12 مەملەكەتتىڭ اۋماعىن قامتيدى. ەكسپەديتسيا 2026 جىلى 13 ماۋسىمدا باستالىپ، 26 شىلدەگە دەيىن جالعاسادى.
دەلەگاتسيا قۇرامىا 38 قاتىسۋشىدان (جۇرگىزۋشىلەردى قوسقاندا 59 ادام) تۇرادى. ولاردىڭ قاتارىندا عالىمدار، ينۆەستورلار جانە تۇراقتى دامۋ سالاسىنىڭ ماماندارى بار. ولار BYD ماركالى 13 ەلەكتروموبيلمەن ساپارعا شىققان.
جوبانى M31 Capital كومپانياسىنىڭ نەگىزىن قالاۋشى پاتريك چجۋن جانە كولۋمبيا ۋنيۆەرسيتەتىنىڭ تۇراقتى دامۋ ورتالىعىنىڭ وكىلدەرى دجەففري جانە سونيا ەرليح ساكس ۇيىمداستىرعان.
پاتريك چجۋننىڭ ايتۋىنشا، ەكسپەديتسيانىڭ باستى ماقساتى – ءوزارا قۇرمەتكە نەگىزدەلگەن الەمدىك بايلانىستى نىعايتۋ.
– بۇگىندە الەم تىم بولشەكتەنىپ كەتتى. ءبىز ءبىر نۇكتەدەن ەكىنشىسىنە ۇشاقپەن تەز جەتەمىز دە، اراداعى كەڭىستىكتى، ونداعى ادامدار مەن مادەنيەتتى بايقامايمىز. ءبىزدىڭ ماقساتىمىز – الەمدى جاقىنداستىرۋ. ەگەر جەتكىزگىمىز كەلەتىن باستى وي بولسا، ول بەيبىتشىلىككە ۇندەۋ، – دەدى پاتريك چجۋن.
قازاقستانداعى باعىت اقتاۋ، ماڭعىستاۋ، بەينەۋ، شىمكەنت جانە تاراز ارقىلى ءوتتى. ال دەلەگاتسيانىڭ ەلىمىزدەگى ساپارىنىڭ سوڭعى نۇكتەسى 13-14 شىلدە كۇندەرى الماتى قالاسى بولدى.
پاتريك چجۋن ءۇشىن بۇل ساپار ءوڭىردىڭ تاريحي مۇراسىمەن جاقىنىراق تانىسۋعا مۇمكىندىك بەرگەن.
– الماتى – ۇلى جىبەك جولىنداعى ەڭ ماڭىزدى قالالاردىڭ ءبىرى. مەن ءۇشىن بۇل جەرگە كەلۋ – وسى تاريحي مەكەندى ءوز كوزىممەن كورۋ مۇمكىندىگى. ءبىز جاي عانا ساياحاتتاپ جۇرگەن جوقپىز، ادامداردىڭ وقيعاسىن جيناپ، وسى ءوڭىردىڭ ماڭىزىن جاڭاشا تانىپ-بىلگىمىز كەلەدى، – دەدى ول.
ەكسپەديتسيادا پاتريك چجۋننىڭ ۇلى دجيممي دە بار. جاس ساياحاتشى الماتىنىڭ اسقاق تابيعاتى ەرەكشە اسەر قالدىرعانىن ايتتى. سونداي-اق، قازاقتىڭ ۇلتتىق تاعامدارىمەن تانىسقان ول جىلقى ەتىنەن جاسالعان تاعامدارعا ساقتىقپەن قاراعانىمەن، جەرگىلىكتى اسحانانىڭ وزگە دامدەرىن جوعارى باعالاعانىن جەتكىزدى.
پاتريك چجۋن ەكولوگيالىق ماسەلەگە دە ەرەكشە توقتالدى.
– مۇنداعى تابيعاتتىڭ سۇلۋلىعىن سوزبەن جەتكىزۋ قيىن. بىراق ول وتە نازىك. ءبىز كليماتتى قورعاۋدىڭ قانشالىقتى ماڭىزدى ەكەنىن بۇكىل الەمگە كورسەتكىمىز كەلەدى. ەگەر بۇگىن تابيعاتتى قورعاماساق، ەرتەڭ بۇل ۇدەرىستى توقتاتۋ مۇمكىن بولماي قالۋى مۇمكىن، – دەدى ول.
الماتى قالاسى تۋريزم باسقارماسىنىڭ مالىمەتىنشە، مەگاپوليستە دەلەگاتسيا ءۇشىن قالانىڭ تابيعي-رەكرەاتسيالىق الەۋەتى مەن كرەاتيۆتى ەكونوميكاسىن تانىستىرۋعا باعىتتالعان ارنايى باعدارلاما ۇيىمداستىرىلعان.
– ەكسپەديتسيا قاتىسۋشىلارى قازاقستان وڭىرلەرىنىڭ تابيعاتى مەن مادەني داستۇرلەرىمەن تانىستى. الماتىعا كەلگەندە ولار «شىمبۇلاق» تاۋ كۋرورتىن ارالاپ، الماتى وبلىسىنداعى بۇركىتشىلىك ونەرىمەن تانىستى. سونىمەن قاتار «گورەلنيك» ۆيزيت ورتالىعىندا جانە جاڭا Almaty Museum of Arts مۋزەيىندە بولدى.
قازاقستانداعى كەزەڭ اياقتالعاننان كەيىن ەكسپەديتسيا قىتايعا بەت الادى. الدا ولار جولدىڭ سوڭعى ۇشتەن ءبىر بولىگىن ءجۇرىپ ءوتىپ، ءۇرىمجى، سيان، شانحاي جانە شەنچجەن ارقىلى سوڭعى مەجەسى – گونكونگقا جەتەدى.
ەكسپەديتسيا بارىسىندا تۇسىرىلگەن دەرەكتى فيلم، ۆلوگتار مەن پودكاستتار الەمنىڭ جەتەكشى مەدياپلاتفورمالارىندا جاريالانادى. بۇل الماتىنى تاريحي مۇراسى مەن تۇراقتى دامۋ قاعيداتتارىن ۇشتاستىرعان ەۋرازياداعى ماڭىزدى توراپتاردىڭ ءبىرى رەتىندە حالىقارالىق دەڭگەيدە تانىتۋعا مۇمكىندىك بەرەدى.
