ارباتتا «ياندەكس مۋزىكا» سەرۆيسىنىڭ كوپشىلىككە اشىق مۋزىكالىق «Go ستۋدياسى» جۇمىسىن باستادى.
قازاقستاندا العاش رەت ۇيىمداستىرىلىپ وتىرعان جوبا 20 تامىزدان 20 قىركۇيەككە دەيىن جالعاسادى.
32 كۇن ىشىندە ستۋديا ساحناسىندا 37 ءارتىس ونەر كورسەتەدى. كۇندىز مۋزىكانتتار جاڭا مۋزىكالىق شىعارمالارمەن جۇمىس ىستەسە، كەشكە كورەرمەندەرگە جاندى قويىلىمدار ۇسىنادى.
جوباعا V $ X V PRiNCE, ALEM, A.Z.، KABDOL, M’Dee, Yenlik, Ayau, ALPHA, AYREE, Moreart, Liili, IL’HAN جانە باسقا دا ورىنداۋشىلار قاتىسادى. سونداي-اق وڭتۇستىك كورەيادان كەلگەن K-pop ءارتىسى Chrich ارنايى قوناق رەتىندە ونەر كورسەتەدى. ول قازاقستاندىق Bonapart ورىنداۋشىسىمەن بىرگە بىرلەسكەن ترەك جازباق.
مۋزىكالىق ستۋديانىڭ العاشقى قاتىسۋشىلارىنىڭ ءبىرى — hatikoali. ءارتىس 20-22 تامىز ارالىعىندا ءوزىنىڭ جاڭا «INDI/GO» البومىمەن جۇمىس ىستەيدى.
ارباتقا كەلگەن قوناقتار البومنىڭ جازىلۋ بارىسىن باقىلاپ، كونتەنت ءتۇسىرىپ، بولاشاق شىعارمالاردىڭ رەليزگە دەيىنگى دەموۆەرسيالارىن تىڭداي الادى.
hatikoali-ءدىڭ ايتۋىنشا، «IndiGO» اتاۋى كوك پەن كۇلگىن تۇستەردىڭ اراسىنداعى ينديگو تۇسىمەن بايلانىستى. بۇل ورىنداۋشىنىڭ شىعارماشىلىق جولىنداعى وتپەلى كەزەڭىن بەينەلەيدى.
ۇيىمداستىرۋشىلاردىڭ مالىمەتىنشە، «Go ستۋدياسى» مۋزىكالىق شىعارمالاردىڭ قالاي دۇنيەگە كەلەتىنىن كورەرمەنگە تىكەلەي كورسەتۋگە باعىتتالعان. قوناقتار العاشقى يدەيادان باستاپ ۆوكال جازۋعا جانە دايىن شىعارمانىڭ جاندى ورىندالۋىنا دەيىنگى پروتسەستى باقىلاي الادى.
