الماتى قالاسىندا جۋرناليستيكا فاكۋلتەتىنىڭ ستۋدەنتتەرىنىڭ قاتىسۋىمەن مەدياسالادا جاساندى ينتەللەكت قۇرالدارىن قولدانۋ تاقىرىبىنداعى ءبىلىم بەرۋ ترەنينگتەرى اياقتالدى.
ءبىر اپتا ىشىندە قالانىڭ جەتەكشى جوعارى وقۋ ورىندارىندا ۇيىمداستىرىلعان وقۋعا 100-گە جۋىق ستۋدەنت قاتىستى.
ترەنينگكە قاتىسۋشىلار ءتۇرلى تسيفرلىق پلاتفورمالارعا ارنالعان كونتەنت ازىرلەۋ، اقپاراتتىڭ دۇرىستىعىن تەكسەرۋ (فاكتچەكينگ), دەرەكتەردى تالداۋ جانە رەداكتسيا جۇمىسىندا تسيفرلىق قۇرالداردى پايدالانۋ بويىنشا ءبىلىم الدى. سونىمەن قاتار مۋلتيمەديالىق جۋرناليستيكا، مەدياەتيكا، الەۋمەتتىك جەلىلەرمەن جۇمىس ىستەۋ جانە كونتەنتتى دايىنداۋ مەن ىلگەرىلەتۋدە جاساندى ينتەللەكت تەحنولوگيالارىن قولدانۋ ماسەلەلەرىنە ەرەكشە كوڭىل ءبولىندى.
باعدارلامانىڭ باستى ەرەكشەلىگى ونىڭ تاجىريبەگە نەگىزدەلگەن فورماتىندا بولدى. ساباقتاردى ءىرى كومپانيالار مەن مەملەكەتتىك ۇيىمدارعا ارنالعان جاساندى ينتەللەكت شەشىمدەرىن ازىرلەۋگە جانە ەنگىزۋگە قاتىسىپ جۇرگەن ساراپشىلار جۇرگىزدى. وقۋ بارىسىندا ستۋدەنتتەر ناقتى تاجىريبەلىك جاعدايلاردى تالداپ، زاماناۋي رەداكتسيالاردىڭ جۇمىس تاسىلدەرىمەن تانىستى جانە پراكتيكالىق تاپسىرمالار ورىندادى.
«جاساندى ينتەللەكت جۋرناليست ماماندىعىن الماستىرمايدى. الايدا ول فاكتىنى تەكسەرۋگە، وزىندىك كوزقاراسقا جانە كاسىبي جاۋاپكەرشىلىككە ءمان بەرمەيتىن جۋرناليستيكانىڭ قۇنىن تومەندەتەدى. الگوريتم ءماتىن جازا الادى، بىراق ونىڭ ناقتىلىعىنا نەمەسە جاريالانىم سالدارىنا جاۋاپ بەرمەيدى. بۇل – ءجۋرناليستىڭ مىندەتى. سوندىقتان بولاشاق ماماندار جاڭا قۇرالداردى مەڭگەرىپ قانا قويماي، ولاردى قاي كەزدە جانە قالاي قولدانۋ كەرەكتىگىن، سونداي-اق ولاردىڭ مۇمكىندىكتەرى مەن شەكتەۋلەرىن جاقسى ءتۇسىنۋى قاجەت»، – دەدى «كسەلل» اق-نىڭ (Kcell جانە activ برەندتەرى) PR ءبولىمىنىڭ باسشىسى بايرام ازيزوۆ.
جوبا قازاقستان رەسپۋبليكاسىنىڭ مادەنيەت جانە اقپارات مينيسترلىگى مەن «كسەلل» اق اراسىنداعى ىنتىماقتاستىق تۋرالى مەموراندۋم اياسىندا جۇزەگە اسىرىلدى. بۇل ترەنينگتەر كومپانيانىڭ قازاقستانداعى جۋرناليستەر قاۋىمداستىعىنىڭ كاسىبي الەۋەتىن دامىتۋعا باعىتتالعان باستامالارىنىڭ جالعاسى بولدى.
ايتا كەتەيىك، وتكەن جىلى كومپانيا وڭىرلىك بۇقارالىق اقپارات قۇرالدارىنىڭ وكىلدەرىنە مەدياسالاداعى زاماناۋي تەحنولوگيالاردى قولدانۋ ماسەلەلەرىنە باعىتتالعان وقىتۋ باعدارلاماسىن وتكىزدى. ەكى اي ىشىندە شىمكەنت، اقتاۋ جانە الماتى قالالارىندا ۇيىمداستىرىلعان ترەنينگتەرگە ەلىمىزدىڭ توعىز وڭىرىنەن 50-دەن استام جۋرناليست قاتىستى.
