الماتى قالاسىنىڭ مامانداندىرىلعان اۋدانارالىق اكىمشىلىك سوتى بۇرىنعى ءدىني قىزمەتكەر ياكوۆ ۆورونتسوۆتىڭ قالالىق ادىلەت دەپارتامەنتى مەن قازاقستاننىڭ ادىلەت مينيسترلىگىنە قارسى بەرگەن تالاپ-ارىزىن وندىرىسكە قابىلدادى، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەپ.
تالاپكەر مەملەكەتتىك تىركەۋدەن باس تارتۋدى زاڭسىز دەپ تانۋدى، سونداي-اق جاۋاپكەرلەردى ءدىني بىرلەستىكتى تىركەۋگە مىندەتتەۋدى سۇراپ وتىر. قۇجاتتىڭ وزگە ەگجەي-تەگجەيى جاريالانعان جوق.
بىرنەشە جىل بۇرىن ۆورونتسوۆ قازاقستاندا ورىس پراۆوسلاۆ شىركەۋىنىڭ ماسكەۋ پاتريارحاتىنا باعىنبايتىن دەربەس پراۆوسلاۆ شىركەۋىن قۇرۋعا ارەكەتتەنگەن. ول ادىلەت مينيسترلىگىنە ەكى رەت قۇجات تاپسىرعانىمەن، ەكى مارتە دە تىركەۋدەن باس تارتىلعان.
ياكوۆ ۆورونتسوۆ - استانا جانە الماتى ەپارحياسىنىڭ بۇرىنعى يەروموناحى. ول 2023 جىلى رەسەيدىڭ ۋكرايناداعى اسكەري ارەكەتىن جانە شىركەۋ باسشىلىعىن سىنعا العاننان كەيىن كوپشىلىككە تانىلدى. الەۋمەتتىك جەلىدەگى پاراقشاسىندا ول شىركەۋلىك قىزمەتىن توقتاتاتىنىن مالىمدەپ، قازاقستاندا ميسسيونەرلىك قىزمەت جۇرگىزۋدىڭ مورالدىق نەگىزى دەكولونيزاتسيا مەن دەكوممۋنيزاتسيادان باستالۋى ءتيىس ەكەنىن ايتقان.
2024 جىلى ۆورونتسوۆ قىزمەتىنەن شەتتەتىلىپ، ءدىني قىزمەتكەر مارتەبەسىنەن ايىرىلدى. سونىمەن قاتار وعان قازاقستان رەسپۋبليكاسى قىلمىستىق كودەكسىنىڭ 141-بابى بويىنشا ءىس قوزعالعان. كەيىن تەرگەۋ قىلمىس قۇرامىنىڭ بولماۋىنا بايلانىستى توقتاتىلعان.
