الماتىدا قوعامنىڭ ءتۇرلى سالاسىنىڭ وكىلدەرى قالا تۇرعىندارىن ازاماتتىق بەلسەندىلىك تانىتىپ، 23 تامىزدا وتەتىن قۇرىلتاي دەپۋتاتتارىنىڭ سايلاۋىنا قاتىسۋعا شاقىردى. ۇندەۋگە زيالى قاۋىم وكىلدەرى، ارداگەرلەر، عالىمدار، مادەنيەت جانە ونەر قايراتكەرلەرى، سپورتشىلار، كاسىپكەرلەر، قوعام بەلسەندىلەرى، ءوندىرىس پەن قىزمەت كورسەتۋ سالاسىنىڭ ماماندارى، جاستار مەن بلوگەرلەر قوسىلدى.
ولاردىڭ پىكىرىنشە، سايلاۋعا قاتىسۋ ءار ازاماتتىڭ ەلدىڭ قوعامدىق-ساياسي ومىرىنە دەگەن جاۋاپكەرشىلىگىن بىلدىرەتىن ماڭىزدى قادام.
الماتىنىڭ ارداگەرلەر قاۋىمى دا باستامانى قولدادى. قالالىق ارداگەرلەر كەڭەسىنىڭ كەڭەيتىلگەن وتىرىسىندا الداعى سايلاۋعا قاتىسۋ ماسەلەسى تالقىلانىپ، ءتۇسىندىرۋ جۇمىستارىن جۇرگىزۋ ءۇشىن ارنايى شتاب قۇرىلدى.
ەتنومادەني بىرلەستىكتەردىڭ وكىلدەرى دە ۇندەۋ جولداپ، سايلاۋعا قاتىسۋدى ەل بىرلىگى مەن ورتاق بولاشاق الدىنداعى جاۋاپكەرشىلىكتىڭ كورىنىسى دەپ باعالادى. ولار قازاقستانداعى ەتنوسارالىق كەلىسىم مەن ءوزارا قۇرمەت قۇندىلىقتارىنا توقتالىپ، ءار ازاماتتىڭ جاۋاپتى ۇستانىمى قوعامدىق تۇراقتىلىق پەن بىرلىكتى نىعايتۋعا ىقپال ەتەتىنىن جەتكىزدى.
عىلىمي-ساراپشىلىق قاۋىمداستىق تا ورتاق ۇندەۋگە قوسىلدى. عالىمدار ازاماتتاردى سايلاۋ ۇدەرىسىنە جاۋاپكەرشىلىكپەن قاتىسۋعا شاقىردى. سونىمەن قاتار فيلوسوفيا، ساياساتتانۋ جانە ءدىنتانۋ ينستيتۋتىنىڭ ساراپتامالىق الاڭىندا قۇرىلتاي سايلاۋىنىڭ قوعامدىق-ساياسي ماڭىزى، ساياسي جۇيەنى جەتىلدىرۋدەگى جانە قوعامدىق ديالوگتى دامىتۋداعى ءرولى تالقىلاندى.
الماتى قالاسىنىڭ قوعامدىق كەڭەسى ارنايى وتىرىس وتكىزىپ، ازاماتتىق بەلسەندىلىكتىڭ ماڭىزىنا نازار اۋداردى. كەڭەس مۇشەلەرى داۋىس بەرۋ ەل بولاشاعىنا بەي-جاي قارامايتىن ازاماتتىق ۇستانىمنىڭ كورىنىسى ەكەنىن اتاپ ءوتتى.
ۇندەۋگە سپورت قاۋىمداستىعىنىڭ وكىلدەرى دە قوسىلدى. بەلگىلى سپورتشىلار الماتىلىقتاردى 23 تامىزدا سايلاۋ ۋچاسكەلەرىنە بارىپ، تاڭداۋ جاساۋعا شاقىردى. سونداي-اق، الپينيستەر دە بۇل باستامانى قولداپ، ازاماتتىق بەلسەندىلىكتىڭ قوعام ومىرىندەگى رولىنە توقتالدى.
كاسىپكەرلەر مەن بيزنەس قاۋىمداستىعىنىڭ وكىلدەرى دە بەلسەندى ازاماتتىق ۇستانىم تانىتىپ وتىر. قۇرىلىس، قوناق ءۇي، كولىك، كونسالتينگ جانە باسقا دا سالالاردىڭ كاسىپكەرلەرى داۋىس بەرۋگە قاتىسۋدىڭ ماڭىزىن اتاپ ءوتتى. ولاردىڭ قاتارىندا «ياندەكس تاكسي» كومپانياسىنىڭ وكىلى مەن وزگە دە بيزنەس كوشباسشىلارى بار.
ورتاق باستاماعا قالانىڭ ءىرى ونەركاسىپ كاسىپورىندارىنىڭ ەڭبەك ۇجىمدارى دا اتسالىستى. «قازلەگپروم-الماتى»، «اسفالتوبەتون 1»، «الماتى نان» جانە Angelcher كومپانيالارىنىڭ قىزمەتكەرلەرى ادال ەڭبەك پەن ازاماتتىق جاۋاپكەرشىلىكتىڭ ءوزارا ساباقتاس ۇعىم ەكەنىن ايتتى. ءوندىرىس ماماندارى ەلدىڭ تۇراقتى دامۋى، وتباسى ءال-اۋقاتى مەن بالالاردىڭ بولاشاعى وزدەرى ءۇشىن ماڭىزدى ەكەنىن جەتكىزدى.
قۇرىلىس سالاسىنىڭ ماماندارى دا وسى ويدى قولدادى. BI Group قىزمەتكەرلەرى كۇن سايىن قالانىڭ دامۋىنا، جاڭا تۇرعىن ۇيلەر مەن زاماناۋي ينفراقۇرىلىم قالىپتاستىرۋعا ۇلەس قوسىپ جۇرگەنىن اتاپ، سايلاۋعا قاتىسۋدى ەل مەن كەلەر ۇرپاق الدىنداعى جاۋاپكەرشىلىكتىڭ ءبىر بولىگى رەتىندە باعالادى.
باستاماعا قىزمەت كورسەتۋ جانە ساۋدا سالاسىنىڭ وكىلدەرى، سونداي-اق قوعامدىق كولىك جۇرگىزۋشىلەرى دە قوسىلدى. قوعامدىق تاماقتانۋ، سەرۆيس جانە شاعىن بيزنەس سالاسىندا ەڭبەك ەتەتىن ماماندار ازاماتتىق بەلسەندىلىك ادامنىڭ كاسىبى مەن الەۋمەتتىك مارتەبەسىنە قاراماستان، بارشاعا ورتاق ەكەنىن اتاپ ءوتتى.
ال كۇن سايىن مەگاپوليس كوشەلەرىندە ەڭبەك ەتەتىن كۋرەرلەر مەن موپەد جۇرگىزۋشىلەرى دە ۇندەۋ جولدادى. 200-دەن استام موپەد جۇرگىزۋشىسى ارنايى بەينەروليكتەرگە قاتىسىپ، قۇرداستارىن ازاماتتىق ۇستانىم تانىتۋعا شاقىردى. ولاردىڭ ايتۋىنشا، جولداعى جاۋاپكەرشىلىك سياقتى ەل بولاشاعىنا قاتىستى شەشىم قابىلداۋداعى سانالى تاڭداۋ دا سونشالىقتى ماڭىزدى.
جاستار مەن بلوگەرلەر ازاماتتاردى سايلاۋعا قاتىسۋعا شىعارماشىلىق فورماتتا ۇندەپ كەلەدى. جاس شوۋمەندەر تانىمال ءاننىڭ اۋەنىنە بەينەروليك ءتۇسىرىپ، مۋزىكا مەن ءازىلدى ازاماتتىق تاڭداۋ تاقىرىبىمەن ۇشتاستىردى.
ءارتۇرلى بۋىن مەن ماماندىق يەلەرىن بىرىكتىرگەن ورتاق وي – قوعام ومىرىنە ارالاسۋ ءار ازاماتتىڭ جەكە تاڭداۋىنان باستالادى.
ونەر مەن سپورت وكىلدەرىنەن باستاپ عالىمدار مەن كاسىپكەرلەرگە، ارداگەرلەر مەن جاس مامانداردان قۇرىلىسشىلار، كۋرەرلەر، قوعام بەلسەندىلەرى مەن بلوگەرلەر الماتىلىقتاردى 23 تامىزدا سايلاۋ ۋچاسكەلەرىنە بارىپ، قۇرىلتاي دەپۋتاتتارىن سايلاۋعا قاتىسۋعا شاقىرادى.
23 تامىز – سايلاۋ كۇنى. ءار داۋىس ماڭىزدى. الماتى – سانالى تاڭداۋ جولىندا.
