پرەزيدەنت قاسىم-جومارت توقاەۆ «نەكە (ەرلى-زايىپتىلىق) جانە وتباسى تۋرالى» كودەكسكە وزگەرىستەر ەنگىزۋ تۋرالى زاڭعا قول قويدى. ەندى سۋرروگات انا قىزمەتىنە تاپسىرىس بەرۋشى رەتىندە تەك نەكەدە تۇرعان قازاقستان ازاماتتارى عانا قاتىسا الادى، دەپ حابارلايدى «ادىرنا» ءتىلشىسى.
بۇعان دەيىن مۇنداي قىزمەتتى شەتەل ازاماتتارى دا پايدالانا الاتىن.
سۋرروگات انامەن جاسالاتىن شارت جازباشا تۇردە راسىمدەلىپ، مىندەتتى تۇردە نوتاريالدى كۋالاندىرىلۋى ءتيىس. شارتقا قول قويىلعان ساتتەن باستاپ ەرلى-زايىپتىلار قوسالقى رەپرودۋكتيۆتىك تەحنولوگيالار ارقىلى دۇنيەگە كەلەتىن بالانىڭ بولاشاق اتا-اناسى رەتىندە تانىلادى.
سونىمەن قاتار سۋرروگات انامەن جاسالعان شارتپەن بىرگە ەرلى-زايىپتىلار قوسالقى رەپرودۋكتيۆتىك تەحنولوگيالاردى قولداناتىن مەديتسينالىق ۇيىممەن دە كەلىسىمشارت جاساسۋى قاجەت.
سونداي-اق تاپسىرىس بەرۋشىلەر سۋرروگات انانىڭ مەديتسينالىق تەكسەرۋدەن وتۋىنە بايلانىستى شىعىنداردى كوتەرۋگە، قوسالقى رەپرودۋكتيۆتىك ادىستەر مەن تەحنولوگيالاردى قولدانۋعا بايلانىستى شىعىنداردى تولەۋگە، قوسالقى رەپرودۋكتيۆتىك ادىستەر مەن تەحنولوگيالاردى قولداناتىن مەديتسينالىق ۇيىمدارعا وزدەرىنىڭ دەنە جانە پسيحيكالىق دەنساۋلىعى تۋرالى مەديتسينالىق قورىتىندىنى، سونداي-اق مەديتسينالىق-گەنەتيكالىق تەكسەرۋ ناتيجەلەرىن ۇسىنۋعا، سۋرروگات انانىڭ جۇكتىلىك، بوسانۋ كەزەڭىندەگى جانە بوسانعاننان كەيىنگى 56 كۇن ىشىندەگى مەديتسينالىق قىزمەت كورسەتۋ شىعىندارىن تولەۋگە، ال جۇكتىلىك پەن بوسانۋعا بايلانىستى اسقىنۋلار تۋىنداعان جاعدايدا بوسانعاننان كەيىنگى 70 كۇنگە دەيىنگى شىعىنداردى وتەۋگە مىندەتتى.
