Prezident Qasym-Jomart Toqaev «Neke (erlı-zaiyptylyq) jäne otbasy turaly» kodekske özgerıster engızu turaly zaŋǧa qol qoidy. Endı surrogat ana qyzmetıne tapsyrys beruşı retınde tek nekede tūrǧan Qazaqstan azamattary ǧana qatysa alady, dep habarlaidy «Adyrna» tılşısı.
Būǧan deiın mūndai qyzmettı şetel azamattary da paidalana alatyn.
Surrogat anamen jasalatyn şart jazbaşa türde räsımdelıp, mındettı türde notarialdy kuälandyryluy tiıs. Şartqa qol qoiylǧan sätten bastap erlı-zaiyptylar qosalqy reproduktivtık tehnologiialar arqyly düniege keletın balanyŋ bolaşaq ata-anasy retınde tanylady.
Sonymen qatar surrogat anamen jasalǧan şartpen bırge erlı-zaiyptylar qosalqy reproduktivtık tehnologiialardy qoldanatyn medisinalyq ūiymmen de kelısımşart jasasuy qajet.
Sondai-aq tapsyrys beruşıler surrogat ananyŋ medisinalyq tekseruden ötuıne bailanysty şyǧyndardy köteruge, qosalqy reproduktivtık ädıster men tehnologiialardy qoldanuǧa bailanysty şyǧyndardy töleuge, qosalqy reproduktivtık ädıster men tehnologiialardy qoldanatyn medisinalyq ūiymdarǧa özderınıŋ dene jäne psihikalyq densaulyǧy turaly medisinalyq qorytyndyny, sondai-aq medisinalyq-genetikalyq tekseru nätijelerın ūsynuǧa, surrogat ananyŋ jüktılık, bosanu kezeŋındegı jäne bosanǧannan keiıngı 56 kün ışındegı medisinalyq qyzmet körsetu şyǧyndaryn töleuge, al jüktılık pen bosanuǧa bailanysty asqynular tuyndaǧan jaǧdaida bosanǧannan keiıngı 70 künge deiıngı şyǧyndardy öteuge mındettı.
