قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى ەرلان قارين قازاقستان تاريحىنىڭ كوپتومدىق اكادەميالىق باسىلىمىن ازىرلەۋ جونىندەگى رەداكتسيالىق القانىڭ قورىتىندى وتىرىسىندا تاريحي تۇلعالار مەن تاريحي كەزەڭدەردى ءبىر-بىرىنە قارسى قويماۋ قاجەت ەكەنىن ايتتى. 
«تاريحقا وبەكتيۆتى باعا بەرۋ اسا ماڭىزدى. تاريحي تۇلعالار مەن تاريحي كەزەڭدەردى ءبىر-بىرىنە قارسى قويماۋ قاجەت. وبەكتيۆتىلىك قاعيداتى تاريحتاعى جەكە تۇلعانىڭ ءرولىن باعالاۋدا دا بايىپتى ءارى سالماقتى ۇستانىمدى تالاپ ەتەدى. ياعني ءبىر تاريحي تۇلعانى اسىرە دارىپتەپ، ونى وزگەلەردەن جوعارى قويۋعا بولمايدى. مۇنىڭ سالدارىنان قوعامدا قاراما-قايشىلىق تۋىندايدى، بەرەكە-بىرلىككە سىزات تۇسەدى. سوندىقتان، تاريحي تۇلعالار تۋرالى ايتقاندا ولار ءومىر سۇرگەن زاماندى، سول كەزدەگى جاعدايلار مەن وقيعالاردىڭ ەرەكشەلىگىن بارىنشا ەسكەرۋ كەرەك»، – دەدى ەرلان قارين رەداكتسيالىق القانىڭ قورىتىندى 14-ءشى وتىرىسىندا.
ەسكە سالا كەتەيىك، بۇگىن استانادا رەداكتسيالىق القانىڭ قورىتىندى وتىرىسى ءوتتى. وندا كوپتومدىقتىڭ سوڭعى 7-ءشى تومى بەكىتىلدى. بۇل توم تاۋەلسىز قازاقستان تاريحىنا ارنالعان.
2025 جىلعى 15 مامىردا قۇرىلعان رەداكتسيالىق القانىڭ قۇرامىنا ءار تومنىڭ جەتەكشىلەرى مەن اۆتورلارىنان بولەك، تاريح ينستيتۋتتارىنىڭ باسشىلارى مەن وكىلدەرى، سونداي-اق فيلوسوفيا، ساياساتتانۋ جانە ءدىنتانۋ ينستيتۋتىنىڭ، م.اۋەزوۆ اتىنداعى ادەبيەت جانە ونەر ينستيتۋتىنىڭ، ۇلتتىق مۋزەيدىڭ، ورتالىق مەملەكەتتىك ءارحيۆتىڭ، قازاقستان تاريحشىلارى ۇلتتىق كونگرەسىنىڭ جانە جوعارى وقۋ ورىندارىنداعى تاريح كافەدرالارىنىڭ وكىلدەرى ەنگەن.
