QR Prezidentı Äkımşılıgı basşysynyŋ bırınşı orynbasary Erlan Qarin Qazaqstan tarihynyŋ köptomdyq akademiialyq basylymyn äzırleu jönındegı Redaksiialyq alqanyŋ qorytyndy otyrysynda tarihi tūlǧalar men tarihi kezeŋderdı bır-bırıne qarsy qoimau qajet ekenın aitty. 
«Tarihqa obektivtı baǧa beru asa maŋyzdy. Tarihi tūlǧalar men tarihi kezeŋderdı bır-bırıne qarsy qoimau qajet. Obektivtılık qaǧidaty tarihtaǧy jeke tūlǧanyŋ rölın baǧalauda da baiypty ärı salmaqty ūstanymdy talap etedı. Iаǧni bır tarihi tūlǧany äsıre därıptep, ony özgelerden joǧary qoiuǧa bolmaidy. Mūnyŋ saldarynan qoǧamda qarama-qaişylyq tuyndaidy, bereke-bırlıkke syzat tüsedı. Sondyqtan, tarihi tūlǧalar turaly aitqanda olar ömır sürgen zamandy, sol kezdegı jaǧdailar men oqiǧalardyŋ erekşelıgın barynşa eskeru kerek», – dedı Erlan Qarin Redaksiialyq alqanyŋ qorytyndy 14-şı otyrysynda.
Eske sala keteiık, bügın Astanada Redaksiialyq alqanyŋ qorytyndy otyrysy öttı. Onda köptomdyqtyŋ soŋǧy 7-şı tomy bekıtıldı. Būl tom Täuelsız Qazaqstan tarihyna arnalǧan.
2025 jylǧy 15 mamyrda qūrylǧan Redaksiialyq alqanyŋ qūramyna är tomnyŋ jetekşılerı men avtorlarynan bölek, tarih instituttarynyŋ basşylary men ökılderı, sondai-aq Filosofiia, saiasattanu jäne dıntanu institutynyŋ, M.Äuezov atyndaǧy Ädebiet jäne öner institutynyŋ, Ūlttyq muzeidıŋ, Ortalyq memlekettık arhivtıŋ, Qazaqstan tarihşylary ūlttyq kongresınıŋ jäne joǧary oqu oryndaryndaǧy tarih kafedralarynyŋ ökılderı engen.
