Kenesary Qasymulynyń Qurany elge qaıtarylyp, Qazaqstan Respýblıkasynyń Memlekettik keńesshisi qolynan QMDB basshysyna tabystaldy, dep jazady "Adyrna".
Qasym-Jomart Toqaev quryltaı otyrysynda Kenesary hannyń Qurany tabylyp, onyń Qazaqstan musylmandary Dinı basqarmasyna tabystalatynyn atap ótken bolatyn.
Búgin Prezıdenttiń tikeleı tapsyrmasy boıynsha Memlekettik keńesshi Erlan Qarın Múftııatqa baryp, Kenesary hannyń Quranyn tabystady.
Bul týraly Erlan Qarın óziniń Facebook paraqshasyndaǵy jazbasynda bólisti.
"Qurannyń túpnusqa qoljazbasy qatty shyǵystyq muqabamen túptelgen. Onyń kólemi 16h23 sm, kitap aqshyl-sary tústi 744 betten turady, árbir betke 12 joldan túsken. Kórkem bezendirilgen paraqtardyń basy, ortasy jáne sońy qolmen jazylǵan. Sondaı-aq, paraqtar altyn, kók, jasyl jáne qyzyl tústi ósimdik sýretterimen ádiptelgen. Al ár joldyń arasy altyn jalatylǵan synappen kómkerilgen" dep jazdy Erlan Qarın óz jazbasynda.
Quran qoljazbasynyń ortasynda qazaq tilinde «Qazaq hany Kenesary. Oǵan Allanyń kómegi bolsyn. Allaǵa úmit artqan (Allaǵa qaıtatyn) kedeı quldyń duǵasymen. Mýlla Maral ıbn Qurban baba...» degen jazý men Ishannyń móri bary jáne qasyna Han Keneniń de móri basylǵany aıtyldy.
Han Keneniń qoly tıgen Qasıetti Qurandy bas múftı Naýryzbaı Qajy Taǵanulyna tabystaldy.
"Qurannyń bul nusqasy qazaq halqynyń tarıhı jádigeri ekeni sózsiz. Sondaı-aq onyń tarıhı jáne mýzeılik qundylyǵy óte joǵary. Búgin Prezıdenttiń tapsyrmasy boıynsha Kenesary hannyń Qurany Qazaqstan musylmandary Dinı basqarmasyna tabystaldy. Solaısha, Kıeli kitap qutty oryna qaıta oraldy" dep qosty QR Memlekettik keńesshisi Erlan Qarın.
"Adyrna" ulttyq portaly
