الماتى وبلىسىدا جەڭىل كولىك ءۇيدىڭ اۋلاسىنا كىرىپ كەتىپ، سالدارىنان ەكى ادام اۋىر جاراقات الدى، دەپ حابارلايدى "ادىرنا" ۇلتتىق پورتالى.
وقيعا قاراساي اۋدانىنداعى كوكساي اۋىلىندا بولعان. الەۋمەتتىك جەلىدە جابىرلەنۋشىلەردىڭ تۋىسى وقيعا تۋعان كۇن ءوتىپ جاتقان كەزدە بولعانىن جازدى. ونىڭ ايتۋىنشا، جۇرگىزۋشى كولىكتى باسقارا الماي، قورشاۋدى بۇزىپ اۋلاعا كىرىپ كەتكەن. سالدارىنان ءبىر ايەلدىڭ قابىرعاسى سىنعان، ال ەكىنشى جابىرلەنۋشىنىڭ اياعىن كەسۋگە تۋرا كەلگەن.
جازبا اۆتورى كولىكتى باسقارعان قىزدىڭ جۇرگىزۋشى كۋالىگى بولماعانىن جانە وقيعا كەزىندە كولىكتە تاعى بىرنەشە ادامنىڭ بولعانىن ايتقان. سونداي-اق جەدەل جاردەمنىڭ كەش كەلگەنىنە قاتىستى دا پىكىر بىلدىرگەن.
الماتى وبلىسى پد اتالعان جول-كولىك وقيعاسىنا بايلانىستى قىلمىستىق ءىس قوزعالعانىن حابارلادى.
پوليتسيانىڭ الدىن الا مالىمەتىنشە، 24 جاستاعى جۇرگىزۋشى Mercedes-Benz كولىگىن تىزگىندەپ كەلە جاتىپ، باسقارۋدى جوعالتىپ، ەكى جاياۋ جۇرگىنشىنى قاعىپ كەتكەن. زارداپ شەككەندەر اۋرۋحاناعا جەتكىزىلدى.
قازىر كۇدىكتى ۇستالىپ، ۋاقىتشا ۇستاۋ يزولياتورىنا قامالدى. تەرگەۋ جالعاسىپ جاتىر.
