ۋگاندانىڭ كاپچورۆا وكرۋگىندە مەكتەپ وقۋشىلارىن تاسىمالداعان اۆتوبۋس جول اپاتىنا ۇشىرادى، دەپ حابارلايدى "ادىرنا" ءتىلشىسى سينحۋاعا سىلتەپ.
جول اپاتىنان 21 ادام كوز جۇمدى. قازا بولعانداردىڭ جيىرماسى – باستاۋىش سىنىپ وقۋشىلارى.
قايعىلى وقيعا چەكۆاتي اۋىلىندا بولعان. پوليتسيانىڭ الدىن الا مالىمەتىنشە، ەل استاناسىنداعى باستاۋىش مەكتەپتىڭ وقۋشىلارى سيپي سارقىراماسىنا ەكسكۋرسيادان قايتىپ كەلە جاتقان.
تەرگەۋ دەرەكتەرىنە سايكەس، كەرى قايتار جولدا اۆتوبۋس جۇرگىزۋشىسى كولىكتى باسقارا الماي قالعان. سالدارىنان اۆتوبۋس جولدان شىعىپ كەتىپ، جول جيەگىندەگى ۇلكەن جارتاسقا سوعىلىپ، اۋدارىلعان.
اپات سالدارىنان بىرنەشە ادام ءتۇرلى دەڭگەيدە جاراقات الىپ، مەديتسينالىق كومەككە جۇگىنگەن.
قازىر قۇقىق قورعاۋ ورگاندارى جول-كولىك وقيعاسىنىڭ ناقتى سەبەپتەرى مەن ءمان-جايىن انىقتاۋ جۇمىستارىن جۇرگىزىپ جاتىر.
