الاكول كولىندە ەكى گيدروتسيكل سوقتىعىسىپ، سالدارىنان ءبىر ادام قازا تاۋىپ، ءبىر ادام ءتۇرلى دارەجەدە جاراقات الدى، دەپ حابارلايدى "ادىرنا" ءتىلشىسى.
جەتىسۋ وبلىسى تجد مالىمەتىنشە، وقيعا 17 شىلدە كۇنى كول اكۆاتورياسىندا بولعان. الدىن الا مالىمەت بويىنشا، سوقتىعىس كەشكى ۋاقىتتا، سۋداعى كورىنۋ دەڭگەيى تومەندەگەن كەزدە ورىن العان.
قازىر اتالعان دەرەك بويىنشا الاكول اۋداندىق پوليتسيا ءبولىمى سوتقا دەيىنگى تەرگەپ-تەكسەرۋ جۇمىستارىن جۇرگىزىپ جاتىر.
تجد وكىلدەرى قولدانىستاعى تالاپتارعا سايكەس ناۆيگاتسيالىق شامدارمەن جابدىقتالماعان شاعىن ءجۇزۋ قۇرالدارىنىڭ قاراڭعى ۋاقىتتا سۋ ايدىنىنا شىعۋىنا قاتاڭ تىيىم سالىناتىنىن ەسكە سالدى.
ۆەدومستۆونىڭ مالىمەتىنشە، 2026 جىلدىڭ 1 شىلدەسىنەن باستاپ وڭىرلىك دەپارتامەنت شاعىن كولەمدى كەمەلەردى پايدالانۋعا مەملەكەتتىك باقىلاۋ جۇرگىزىپ كەلەدى. شومىلۋ ماۋسىمى باستالعالى بەرى الاكولدە كۇن سايىن رەيدتىك ءىس-شارالار ۇيىمداستىرىلعان.
وسى ۋاقىتقا دەيىن سۋداعى قاۋىپسىزدىك تالاپتارى مەن شاعىن كولەمدى كەمەلەردى پايدالانۋ قاعيدالارىن بۇزعانى ءۇشىن 108 اكىمشىلىك حاتتاما تولتىرىلعان. ونىڭ 73-ءى شاعىن كەمەلەردى پايدالانۋ تالاپتارىن بۇزۋعا قاتىستى راسىمدەلىپ، جالپى سوماسى 1 ميلليون تەڭگەدەن استام ايىپپۇل سالىنعان.
