قازاقستاننىڭ سىرتقى ىستەر مينيسترلىگى 2026 جىلعى 17 جانە 19 شىلدەدە قارا تەڭىز اكۆاتورياسىندا كاسپي قۇبىرى كونسورتسيۋمىنىڭ (كقك) ينفراقۇرىلىمى ارقىلى مۇنايدى زاڭدى تۇردە تاسىمالداۋعا تارتىلعان ازاماتتىق كەمەلەرگە ۇشقىشسىز ۇشۋ اپپاراتتارىنىڭ جاساعان شابۋىلدارىن قاتاڭ ايىپتادى، دەپ حابارلايدى "ادىرنا".
«اتالعان شابۋىلداردى قازاقستان رەسپۋبليكاسىنىڭ ەكونوميكالىق مۇددەلەرىنە جول بەرۋگە بولمايتىن قول سۇعۋشىلىق، سونداي-اق زاڭدى حالىقارالىق ساۋدانى، جاھاندىق ەنەرگەتيكالىق نارىقتار مەن حالىقارالىق كولىك-لوگيستيكالىق جەتكىزۋ تىزبەكتەرىنىڭ قاۋىپسىزدىگىن تۇراقسىزداندىرۋعا باعىتتالعان قاساقانا ارەكەتتەر رەتىندە قاراستىرامىز. قارا تەڭىز اكۆاتورياسىنا كقك تەرمينالدارىندا مۇناي تيەۋ ماقساتىندا كىرەتىن ازاماتتىق كەمەلەر تۋرالى اقپارات الماسۋدىڭ بارلىق مۇددەلى تاراپتار بۇرىن كەلىسكەن تەتىگىنىڭ ادەيى ەسكەرىلمەگەنى ەرەكشە الاڭداۋشىلىق تۋعىزادى. بۇل ازاماتتىق كەمەلەر ەكيپاجدارىنىڭ ءومىرى مەن قاۋىپسىزدىگىنە قاتەر ءتوندىردى. قازاقستان شابۋىلداردى دەرەۋ توقتاتۋدى جانە قازاقستاندىق كومىرسۋتەك شيكىزاتى ەكسپورتى ينفراقۇرىلىمىنىڭ قاۋىپسىزدىگىن قامتاماسىز ەتۋ ماقساتىندا جان-جاقتى شارالار قابىلداۋدى تالاپ ەتەدى»، - دەلىنگەن سىرتقى ساياسي ۆەدومستۆو تاراتقان حابارلامادا.
سونداي-اق ءسىم سەرىكتەس مەملەكەتتەردى اتالعان شابۋىلداردى باتىل ايىپتاۋعا شاقىرىپ، بارلىق مۇددەلى تاراپتاردى ناقتى ءىس-جۇزىندەگى شارالاردى بىرلەسىپ ازىرلەۋگە ۇندەدى. حالىقارالىق قۇقىق نورمالارىن مۇلتىكسىز ساقتاۋ عانا وسىنداي وقيعالاردىڭ قايتالانۋىنا جول بەرمەيدى دەپ ەسەپتەيتىندەرىن ايتتى.
«قازىرگى ۋاقىتتا قازاقستان رەسپۋبليكاسى كەلتىرىلگەن زالالعا جان-جاقتى باعالاۋ جۇرگىزۋدە. ونىڭ قورىتىندىلارى بويىنشا قازاقستان ءوزىنىڭ زاڭدى مۇددەلەرىن قورعاۋ ءۇشىن حالىقارالىق قۇقىقتا كوزدەلگەن بارلىق تەتىكتەردى، ونىڭ ىشىندە كەلتىرىلگەن زالالدى وتەۋ تۋرالى تالاپتار قويۋ قۇقىعىن وزىنە قالدىرادى. قازاقستان رەسپۋبليكاسى قاقتىعىستاردى بەيبىت جولمەن رەتتەۋدىڭ بالاماسى جوق ەكەنىن اتاپ كورسەتەدى، حالىقارالىق قۇقىق قاعيداتتارىنا، كەمە قاتىناسى ەركىندىگىنە جانە حالىقارالىق كولىك-لوگيستيكالىق ءارى ەنەرگەتيكالىق باعىتتاردىڭ سەنىمدى جۇمىس ىستەۋىن قامتاماسىز ەتۋگە بەيىلدىلىگىن راستايدى»، - دەدى قر ءسىم.
