اتىراۋدا ءتورت ادامنان تۇراتىن وتباسىنىڭ قازاسىنا قاتىستى قارالىپ جاتقان قىلمىستىق ءىس بويىنشا سوت وتىرىسىندا جابىرلەنۋشى تاراپ سوتتالۋشى سارسەماليەۆتەن 70 ميلليون تەڭگە كولەمىندە وتەماقى ءوندىرۋدى تالاپ ەتتى، دەپ حابارلايدى "ادىرنا" ۇلتتىق پورتالى.
جابىرلەنۋشى رەتىندە مارقۇم ماقسوت قاراباليننىڭ اپكەسى ادەمى شىلماعامبەتوۆا تانىلعان. ول قارابالين جانە وتەشقاليەۆ وتباسىلارىنىڭ اتىنان مورالدىق وتەماقى ءوندىرۋ تۋرالى تالاپ-ارىز بەرگەن. ءوز كەزەگىندە سۇلتان سارسەماليەۆ تالاپپەن كەلىسەتىنىن، الايدا ونى وتەۋگە جەتكىلىكتى مۇلكى مەن قارجىسى جوق ەكەنىن ايتتى.
«مەنىڭ جالعىز بايلىعىم – مەنىڭ كۇندەرىم»، – دەدى سوتتالۋشى سوت بارىسىندا.
ەسكە سالايىق، 2025 جىلدىڭ جەلتوقسانىندا پوليتسياعا 66 جاستاعى ماقسوت قارابالين، 64 جاستاعى ناسيپ وتەشقاليەۆا جانە ولاردىڭ 32 جاستاعى ۇلى مەن 35 جاستاعى قىزىنىڭ ءىز-ءتۇزسىز جوعالعانى تۋرالى حابار تۇسكەن بولاتىن. تۋىستارىنىڭ مالىمەتىنشە، وتباسى مۇشەلەرى قاراشا ايىنان بەرى بايلانىسقا شىقپاعان.
