كونستيتۋتسيا ازاماتتاردىڭ قۇقىقتارى مەن بوستاندىقتارىن بەكىتىپ قانا قويماي، ولاردى قورعاۋدىڭ ءتيىمدى تەتىكتەرىن دە ايقىندايدى. وسى تۇرعىدان العاندا، ادۆوكاتۋرانىڭ جاڭا كونستيتۋتسيا ماتىنىندە بەكىتىلۋى ازاماتتاردىڭ قۇقىقتارى مەن زاڭدى مۇددەلەرىن قورعاۋ كەپىلدىكتەرىن ەداۋىر كۇشەيتتى.
ادۆوكاتۋرانىڭ مارتەبەسى نەگە ماڭىزدى؟
ادۆوكاتۋرانىڭ نەگىزگى مىندەتى – ءاربىر ادامنىڭ بىلىكتى زاڭ كومەگىنە قول جەتكىزۋىنە جانە سوت ارقىلى ءوز قۇقىعىن ءتيىمدى قورعاۋىنا ىقپال ەتۋ. سوندىقتان ادۆوكاتۋرانىڭ كونستيتۋتسيادا جەكە ينستيتۋت رەتىندە بەكىتىلۋى تەك ادۆوكاتتاردىڭ كاسىبي مارتەبەسىنە قاتىستى وزگەرىس ەمەس. بۇل – ازاماتتىڭ قورعانۋ قۇقىعىن قامتاماسىز ەتۋگە باعىتتالعان ماڭىزدى كونستيتۋتسيالىق كەپىلدىك.
ەندى ادۆوكاتۋرانىڭ قىزمەتى تەك سالالىق زاڭدارمەن رەتتەلەتىن كاسىبي سالا رەتىندە ەمەس، ادامنىڭ قۇقىقتارى مەن بوستاندىقتارىن قورعاۋعا قىزمەت ەتەتىن كونستيتۋتسيالىق ينستيتۋت رەتىندە قاراستىرىلادى.
مۇنداي مارتەبە ادۆوكاتۋرانىڭ تۇراقتى دامۋىنا، ادۆوكاتتاردىڭ كاسىبي قىزمەتىن جۇزەگە اسىرۋىنا جانە ازاماتتارعا كورسەتىلەتىن زاڭ كومەگىنىڭ ساپاسىن ارتتىرۋعا قوسىمشا قۇقىقتىق نەگىز قالىپتاستىرادى.
ادۆوكاتۋرا ازاماتتىڭ قۇقىعىن قالاي قورعايدى؟
ادام قۇقىقتىق ماسەلەگە تاپ بولعان كەزدە زاڭنىڭ بارلىق تالابىن وزدىگىنەن بىلۋگە نەمەسە سوتتا ءوز مۇددەسىن كاسىبي دەڭگەيدە قورعاۋعا مىندەتتى ەمەس. مۇنداي جاعدايدا ادۆوكات ازاماتقا ونىڭ قۇقىقتارىن تۇسىندىرەدى، قۇقىقتىق جاعدايىنا باعا بەرەدى، قاجەتتى قۇجاتتاردى دايىندايدى جانە سوتتا نەمەسە وزگە دە مەملەكەتتىك ورگانداردا ونىڭ مۇددەسىن قورعايدى.
وسىلايشا، ادۆوكاتۋرا ازامات پەن كۇردەلى قۇقىقتىق جۇيەنىڭ اراسىنداعى بايلانىستى قامتاماسىز ەتەدى. ول ادامنىڭ زاڭدى قۇقىقتارىن ءىس جۇزىندە پايدالانۋىنا جانە بۇزىلعان قۇقىعىن قالپىنا كەلتىرۋىنە كومەكتەسەدى.
بولەك اتاپ وتكەن ءجون، مەملەكەت ازاماتتاردىڭ جەكەلەگەن ساناتتارىنا تەگىن زاڭ كومەگىن كەپىلدەندىرەدى. الەۋمەتتىك وسال ساناتتاعى تۇلعالار، سونىڭ ىشىندە از قامتىلعان ازاماتتار، مۇگەدەكتىگى بار ادامدار، ارداگەرلەر، زەينەتكەرلەر جانە زاڭدا كوزدەلگەن وزگە دە ساناتتار اكىمشىلىك، ازاماتتىق جانە قىلمىستىق ىستەر بويىنشا ادۆوكاتتىڭ كومەگىن مەملەكەت ەسەبىنەن الا الادى.
ادۆوكاتتار ازاماتتىق، اكىمشىلىك، وتباسىلىق، ەڭبەك جانە باسقا دا قۇقىقتىق داۋلاردا دا ازاماتتاردىڭ مۇددەلەرىن قورعايدى.
ادۆوكاتتىڭ تاۋەلسىزدىگى نە ءۇشىن قاجەت؟
ادۆوكات ءوز قىزمەتىن ەركىن ءارى تاۋەلسىز اتقارا العاندا عانا ازاماتتىڭ قۇقىعىن ءتيىمدى قورعاي الادى. ول مەملەكەتتىك ورگانداردىڭ، تەرگەۋ جۇرگىزەتىن تۇلعالاردىڭ نەمەسە وزگە تاراپتاردىڭ ىقپالىنا تاۋەلدى بولماۋعا ءتيىس.
ادۆوكاتتىڭ تاۋەلسىزدىگى ونىڭ جەكە ارتىقشىلىعى ەمەس. ول ەڭ الدىمەن، زاڭ كومەگىنە جۇگىنگەن ازاماتتىڭ مۇددەسىن قورعاۋى قاجەت. ەگەر ادۆوكاتقا قىسىم جاسالسا نەمەسە ونىڭ كاسىبي قىزمەتىنە كەدەرگى كەلتىرىلسە، بۇل ازاماتتىڭ قورعانۋ قۇقىعىنا تىكەلەي اسەر ەتەدى.
سوندىقتان ادۆوكاتۋرانىڭ كونستيتۋتسيالىق مارتەبەسى ادۆوكاتتاردىڭ زاڭدى كاسىبي قىزمەتىن قورعاۋعا، ولاردىڭ تاۋەلسىزدىگىن نىعايتۋعا جانە ازاماتتاردىڭ ادۆوكاتقا سەنىممەن جۇگىنۋىنە جاعداي جاساۋعا باعىتتالعان.
سونىمەن بىرگە ادۆوكات پەن ازامات اراسىنداعى قۇپيالىلىقتىڭ ساقتالۋى دا ماڭىزدى. ازامات وزىنە قاتىستى اقپاراتتىڭ جاريا بولىپ كەتۋىنەن قورىقپاي، ادۆوكاتقا بارلىق ءمان-جايدى اشىق ايتۋعا ءتيىس. بۇل ساپالى زاڭ كومەگىن كورسەتۋدىڭ نەگىزگى تالاپتارىنىڭ ءبىرى.
ادۆوكاتۋرا قىزمەتى زاڭمەن رەتتەلەدى
ادۆوكاتۋرانىڭ ۇيىمداستىرىلۋى مەن قىزمەت ءتارتىبى، ادۆوكاتتاردىڭ قۇقىقتارى، مىندەتتەرى جانە جاۋاپكەرشىلىگى زاڭمەن ايقىندالادى.
مۇنداي قۇقىقتىق رەتتەۋ ادۆوكاتتاردىڭ بىرىڭعاي كاسىبي تالاپتاردى ساقتاۋىنا، ادۆوكاتتىق ادەپ قاعيدالارىن ورىنداۋىنا جانە كورسەتىلەتىن زاڭ كومەگىنىڭ ساپاسىنا جاۋاپ بەرۋىنە مۇمكىندىك بەرەدى.
ادۆوكاتۋرانىڭ كونستيتۋتسيالىق مارتەبەسى ونىڭ قوعام الدىنداعى جاۋاپكەرشىلىگىن دە ارتتىرادى. ادۆوكات ازاماتتىڭ مۇددەسىن قورعاۋمەن قاتار، زاڭدىلىق قاعيدالارىن ساقتاۋعا، كاسىبي ادالدىق تانىتۋعا جانە ءوز قىزمەتىن بەلگىلەنگەن تالاپتارعا ساي جۇرگىزۋگە مىندەتتى.
ادىلەتتى مەملەكەتتىڭ باستى ولشەمدەرىنىڭ ءبىرى – ازاماتتىڭ ءوز قۇقىقتارى مەن زاڭدى مۇددەلەرىن ءتيىمدى قورعاي الۋى. وسى تۇرعىدان العاندا، ادۆوكاتۋرانىڭ كونستيتۋتسيالىق مارتەبەسىنىڭ بەكىتىلۋى ءاربىر ادامنىڭ بىلىكتى زاڭ كومەگىنە قول جەتكىزۋىنە جانە سوت ارقىلى قورعانۋ قۇقىعىن تولىق پايدالانۋىنا بەرىلگەن ماڭىزدى كەپىلدىك سانالادى.
