قازاقستان پارلامەنتىنىڭ قوس پالاتاسى قوعامدىق ورىنداردا بەتتى جاباتىن كيىمدەردى كيۋگە تىيىم سالۋدى قاراستىراتىن زاڭ جوباسىن قولدادى. بۇل قۇجات مەملەكەت باسشىسىنىڭ قول قويۋىنا جولداندى، دەپ حابارلايدى “ادىرنا”.
اڭگىمە «قۇقىق بۇزۋشىلىقتاردىڭ الدىن الۋ تۋرالى» زاڭعا ەنگىزىلەتىن وزگەرىستەر جونىندە. 19 ماۋسىمدا بۇل قۇجات سەناتتا قارالعان ەدى، الايدا ول قابىلدانباي، كەيبىر تۇزەتۋلەرمەن ماجىلىسكە قايتارىلعان. بۇل تۇزەتۋلەر كۇشتىك قۇرىلىم قىزمەتكەرلەرىنە تۇرعىن ءۇي بەرۋ ماسەلەلەرىنە قاتىستى بولدى.
قوعامدىق ورىنداردا بەتتى جاباتىن كيىمدەردى كيۋگە تىيىم سالۋ نورماسىنا سەناتورلار كەلىسىم ءبىلدىردى.
بۇگىن ءماجىلىس دەپۋتاتتارى زاڭ جوباسىن قايتا قاراپ، ۇسىنىلعان تۇزەتۋلەرمەن كەلىستى. ەندى بۇل قۇجاتقا پرەزيدەنت قول قويۋى ءتيىس.
بۇل جاڭاشىلدىق ادامنىڭ بەت-ءجۇزىن تانۋعا كەدەرگى كەلتىرەتىن كيىمدەردى پايدالانۋ ارقىلى جاسالاتىن قۇقىق بۇزۋشىلىقتاردىڭ الدىن الۋعا باعىتتالعان. مۇنداي كيىمدى زاڭ تالابى بويىنشا، مەديتسينالىق ماقساتتا، ازاماتتىق قورعانىس
قۇجاتتا ناقتى قانداي كيىمدەرگە تىيىم سالىناتىنى كورسەتىلمەسە دە، بۇل تىيىمعا ماسكا مەن بالاكلاۆامەن قاتار، بەت تۇتاس جابىلاتىن ءدىني كيىمدەر، اتاپ ايتقاندا، نيقاب تا كىرۋى مۇمكىن دەگەن بولجام بار. قازاقستاندا نيقابقپ تىيىم سالۋ ماسەلەسى بىرنەشە جىلدان بەرى تالقىلانىپ كەلەدى.
2024 جىلعى ناۋرىزدا قاسىم-جومارت توقاەۆ نيقابتى راديكالدى كوزقاراستاعى نەوفيتتەر قازاقستاندىق ايەلدەرگە تاڭىپ جۇرگەن كونە كيىم ۇلگىسى دەپ اتادى. مەملەكەت باسشىسىنىڭ پىكىرىنشە، بۇل – قازاقتىڭ ءداستۇرلى قۇندىلىقتارىنا جاسالعان اشىق قارسىلىق.
بۇعان دەيىن دە، 2023 جىلدىڭ كۇزىنە قاراي، بيلىك ءدىني كيىمدى قوعامدىق ورىنداردا كيۋگە تىيىم سالۋ ماسەلەسىن قاراستىرۋدى جوسپارلاعان بولاتىن، الايدا ول كەزدە بۇل جۇزەگە اسپاعان ەدى.
