فوتو: dimashnews.com
الەمگە تانىمال قازاقستاندىق ءانشى ديماش قۇدايبەرگەننىڭ لاتىن امەريكاسىنداعى كونتسەرتتىك تۋرى قارساڭىندا مەكسيكاداعى ونەرپازدىڭ جانكۇيەرلەرى ەرەكشە شىعارماشىلىق جوبانى جۇزەگە اسىردى، دەپ حابارلايدى "ادىرنا".
مەكسيكالىق Dears فاناتى، اۋە شارلارىنان ءمۇسىن جاساۋشى سۋرەتشى ولگا ليديا ەرناندەس ءوزىنىڭ شىعارماشىلىق توبىمەن جانە Dimash & Dears Regias فان-كلۋبىنىڭ مۇشەلەرىمەن بىرلەسىپ، ديماشتىڭ بيىكتىگى 4,5 مەتر بولاتىن ءمۇسىنىن جاسادى.
ينستاللياتسيا نۋەۆو-لەون شتاتىنىڭ مونتەررەي قالاسىنداعى حالىق كوپ جينالاتىن ساۋدا ورتالىقتارىنىڭ بىرىنە قويىلدى. ءدال وسى قالادا 2026 جىلعى 14 قاراشادا ديماش جاڭا DiMENSIONS الەمدىك تۋرى اياسىندا كونتسەرت بەرەدى.
ۇيىمداستىرۋشىلاردىڭ ايتۋىنشا، بۇل جوبا قالا تۇرعىندارىن قازاقستاندىق ونەرپازدىڭ شىعارماشىلىعىمەن تانىستىرىپ، الداعى كونتسەرتكە نازار اۋدارۋدى ماقسات ەتەدى. ەرەكشە ءمۇسىن قازىردىڭ وزىندە ساۋدا ورتالىعىنا كەلۋشىلەردىڭ قىزىعۋشىلىعىن وياتىپ، ديماشتىڭ مونتەررەيگە جاقىن ارادا كەلەتىنىنىڭ جارقىن بەلگىسىنە اينالىپ وتىر.
