پۋساندا قازاقستان ۇسىنعان "ماڭعىستاۋدىڭ جەراستى مەشىتتەرى جانە ولارمەن بايلانىستى كيەلى نىساندار" نوميناتسياسىن قاراۋ جوسپارلانىپ وتىرعان يۋنەسكو-نىڭ دۇنيەجۇزىلىك مۇرا كوميتەتىنىڭ 48-ءشى سەسسياسى باستالدى، دەپ حابارلايدى "ادىرنا".
قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى ەرلان قارين الەۋمەتتىك جەلىدەگى رەسمي پاراقشاسىندا قازاقستاننىڭ يۋنەسكو-داعى نوميناتسياعا قالاي دايىندالعانىن ايتىپ بەردى. ونىڭ ايتۋىنشا، 2024 جىلى ۇلتتىق قۇرىلتايدىڭ اتىراۋدا وتكەن وتىرىسىندا قازاقستان پرەزيدەنتى قاسىم-جومارت توقاەۆ ماڭعىستاۋدىڭ بىرەگەي جارتاستى مەشىتتەرىن يۋنەسكو-نىڭ دۇنيەجۇزىلىك مۇرالار تىزىمىنە ەنگىزۋ جۇمىستارىن باستاۋدى تاپسىرعان بولاتىن.
"وسى ۋاقىت ارالىعىندا نوميناتسيالىق ماتەريالداردى ازىرلەۋ باعىتىندا اۋقىمدى جۇمىس اتقارىلدى. ونىڭ اياسىندا عىلىمي نەگىزدەمەلەر دايىندالىپ، قۇقىقتىق جانە ۇيىمداستىرۋشىلىق تۇرعىدان جان-جاقتى پىسىقتالدى. بىلتىر يۋنەسكو-نىڭ باعالاۋ ميسسياسى ەلىمىزگە ارنايى كەلسە، ال جۋىردا يۋنەسكو-نىڭ دۇنيەجۇزىلىك مۇرالار ورتالىعى جانە ەسكەرتكىشتەر مەن تاريحي ورىنداردى ساقتاۋ جونىندەگى حالىقارالىق كەڭەستىڭ (ICOMOS) تەحنيكالىق قورىتىندىلارى الىندى", دەپ جازدى ساياساتكەر جەلىدە.
كەشە كورەيا رەسپۋبليكاسىنىڭ پۋسان قالاسىندا يۋنەسكو-نىڭ دۇنيەجۇزىلىك مۇرالار كوميتەتىنىڭ 48-سەسسياسى ءوز جۇمىسىن باستادى. 29 شىلدەگە دەيىن جالعاساتىن جاھاندىق جيىنعا دۇنيەجۇزىلىك مادەني جانە تابيعي مۇرانى قورعاۋ تۋرالى كونۆەنتسياعا قاتىسۋشى 196 مەملەكەتتىڭ ءۇش مىڭعا جۋىق دەلەگاتى، سونداي-اق حالىقارالىق ۇيىمدار مەن ساراپشىلار قاۋىمداستىعىنىڭ وكىلدەرى جينالعان.
الداعى 10 كۇن ىشىندە كوميتەت يۋنەسكو-نىڭ دۇنيەجۇزىلىك مۇرالار تىزىمىنە ەنگىزۋگە ۇسىنىلعان 30 جاڭا نوميناتسيانى قارايدى. سولاردىڭ قاتارىندا قازاقستان ۇسىنعان "ماڭعىستاۋدىڭ جارتاستى مەشىتتەرى جانە ولارمەن بايلانىستى كيەلى ورىندار" نوميناتسياسى دا بار.
"بۇل نوميناتسيا بويىنشا قابىلداناتىن وڭ شەشىم ەلىمىز ءۇشىن اسا ماڭىزدى وقيعالاردىڭ ءبىرى بولماق", دەپ تۇيىندەيدى ءسوزىن ەرلان قارين.
