قازاقستاننىڭ الماتى قالاسى مەن يراننىڭ شىعىس ازەربايجان پروۆينتسياسىنداعى تەبريز قالاسى جاقىن ۋاقىتتا باۋىرلاس قالالار مارتەبەسىنە يە بولۋى مۇمكىن. قازىرگى تاڭدا وسىعان قاتىستى ەكىجاقتى كەلىسىمگە قول قويۋ جۇمىستارى جۇرگىزىلۋدە. بۇل تۋرالى Mehr News جازدى، دەپ حابارلايدى "ادىرنا".
بۇل تۋرالى تەبريزدىڭ جەرگىلىكتى بۇقارالىق اقپارات قۇرالدارى حابارلادى. مالىمەتكە سايكەس، تەبريز قالاسىنىڭ اكىمى ياكۋب حۋشيار يرانداعى قازاقستان رەسپۋبليكاسىنىڭ توتەنشە جانە وكىلەتتى ەلشىسى ونتالاپ وڭالباەۆپەن كەزدەسۋدە باۋىرلاستىق تۋرالى كەلىسىمدى راسىمدەۋ باعىتىنداعى جۇمىستاردىڭ جالعاسىپ جاتقانىن ايتتى.
كەزدەسۋ بارىسىندا قالا اكىمى تەبريزدىڭ تاريحي، مادەني، عىلىمي، وندىرىستىك جانە ەكونوميكالىق الەۋەتىنە توقتالىپ، ەلشىنىڭ ساپارى قازاقستان مەن يران اراسىنداعى وڭىرارالىق ىنتىماقتاستىقتى نىعايتۋعا ىقپال ەتەتىنىنە سەنىم ءبىلدىردى. ونىڭ ايتۋىنشا، تاراپتار مادەنيەت، الەۋمەتتىك بايلانىستار، ەكونوميكا جانە كولىك-لوگيستيكا سالالارىنداعى ءوزارا ارىپتەستىكتى دامىتۋعا مۇددەلى.
ايتا كەتەيىك، الماتى مەن تەبريزدى باۋىرلاس قالالار رەتىندە جاريالاۋ تۋرالى باستاما العاش رەت 2016 جىلى تەبريز قالالىق كەڭەسى تاراپىنان كوتەرىلگەن بولاتىن. الايدا بۇل ۇسىنىس وسى ۋاقىتقا دەيىن ءىس جۇزىندە جۇزەگە اسىرىلماعان.
ەگەر كەلىسىمگە قول قويىلسا، الماتى مەن تەبريز اراسىنداعى ارىپتەستىك ەكى قالا اراسىنداعى مادەني-گۋمانيتارلىق بايلانىستاردى كەڭەيتىپ، ساۋدا-ەكونوميكالىق جانە ينۆەستيتسيالىق ىنتىماقتاستىقتى دامىتۋعا جاڭا مۇمكىندىكتەر اشادى.
