قازاقستاننىڭ ەڭ ءىرى مەگاپوليسى الماتى اۋانىڭ ساپاسى بويىنشا الەمدەگى ەڭ لاستانعان قالالاردىڭ قاتارىنان تابىلدى، دەپ حابارلايدى "ادىرنا" ۇلتتىق پورتالى.
IQAir دەرەكتەرىنە سايكەس، 28 قازان كۇنى الماتى ءتورتىنشى ورىندا تۇر.
قالاداعى اۋا ساپاسىنىڭ يندەكسى (AQI) 174-كە جەتىپ، بۇل كورسەتكىش دەنساۋلىققا زياندى دەڭگەي سانالادى، اسىرەسە سەزىمتال توپتار ءۇشىن قاۋىپتى. الماتىدان جوعارى ورىنداردى لاحور، بەيجىڭ جانە دەلي يەلەنگەن.
ءبىرىنشى وندىققا داككا، تاشكەنت، دۋباي، باتام جانە ۇلان-باتىر قالاسى ەنگەن. ال 30 ەڭ لاس قالانىڭ ىشىندە ازيادان تىس ورنالاسقان جالعىز قالا – پەرۋ استاناسى ليما.
بۇعان دەيىن ساراپشىلار الماتىداعى اۋانىڭ لاستانۋىنا ەڭ كوپ اسەر ەتەتىن فاكتور رەتىندە كولىكتەردى اتاعان ەدى.
ۇقساس جاڭالىقتار
