قازاقستاندا ادەبي شىعارمالاردىڭ جەكەلەگەن ۇزىندىلەرىن الىپ تاستاۋعا نەمەسە بوياپ جابۋعا قاتىستى زاڭنامالىق تالاپ جوق، دەپ حابارلايدى "ادىرنا" ۇلتتىق پورتالى Tengrinews-قا سىلتەپ.
بۇل تۋرالى مادەنيەت جانە اقپارات مينيسترلىگى حابارلاعان.
الەۋمەتتىك جەلىدە استاناداعى كىتاپ دۇكەندەرىنىڭ بىرىنەن ساتىپ الىنعان شەتەلدىك باسپانىڭ كىتابىندا ءماتىننىڭ ءبىر بولىگى بويالعانى تۋرالى جازبا كەڭىنەن تالقىلانعان. وقىرماندار مۇنداي باسىلىمداردىڭ قازاقستاندا ەشقانداي تۇسىندىرمەسىز ساتىلۋىنا قاتىستى ساۋال كوتەرگەن ەدى.
مينيسترلىكتىڭ تۇسىندىرۋىنشە، قولدانىستاعى زاڭنامادا كىتاپتاردى باسىپ شىعارۋ نەمەسە تاراتۋ كەزىندە ولاردىڭ جەكەلەگەن بولىكتەرىن مىندەتتى تۇردە جاسىرۋ نە جويۋ تۋرالى تالاپ قاراستىرىلماعان. ۆەدومستۆونىڭ مالىمەتىنشە، كىتاپتاعى ءماتىننىڭ وزگەرتىلۋى نەمەسە جەكەلەگەن ۇزىندىلەردىڭ جابىلۋى شەتەلدىك باسپانىڭ رەداكتسيالىق ساياساتىنا جانە كىتاپ جارىق كورگەن ەلدىڭ زاڭناماسىنا بايلانىستى جۇزەگە اسىرىلادى.
سونىمەن قاتار قازاقستاندا ەكسترەميزمدى، تەرروريزمدى، ارازدىقتى قوزدىرۋدى ناسيحاتتايتىن جانە زاڭمەن تىيىم سالىنعان وزگە دە اقپاراتتى تاراتۋعا تىيىم سالىنعان. الايدا بۇل تالاپ كىتاپتىڭ جەكەلەگەن بەتتەرىن رەداكتسيالاۋعا ەمەس، باسىلىمدى تۇتاستاي تاراتۋعا قاتىستى قولدانىلادى. مينيسترلىك شەتەلدىك باسپا ونىمدەرىنە الدىن الا رەداكتسيالىق باقىلاۋ نەمەسە تسەنزۋرا جۇرگىزبەيتىنىن اتاپ ءوتتى. باسىلىمنىڭ مازمۇنى مەن رەداكتسيالىق دايىندىعى ونى شىعارعان مەملەكەتتىڭ زاڭناماسىنا سايكەس باسپا تاراپىنان ايقىندالادى. ۆەدومستۆونىڭ حابارلاۋىنشا، قازاقستاندا كىتاپ دۇكەندەرىن ساتىپ الۋشىلارعا باسىلىمداعى رەداكتسيالىق وزگەرىستەر تۋرالى مىندەتتى تۇردە ەسكەرتۋگە مىندەتتەيتىن ارنايى قۇقىقتىق نورما جوق. دەگەنمەن، «تۇتىنۋشىلاردىڭ قۇقىقتارىن قورعاۋ تۋرالى» زاڭعا سايكەس، ساتىپ الۋشى تاۋار تۋرالى تولىق ءارى شىنايى اقپارات الۋعا قۇقىلى. ەگەر تولىق ەمەس نەمەسە دۇرىس ەمەس اقپارات تۇتىنۋشىنىڭ تاڭداۋىنا اسەر ەتسە، ول ءوز قۇقىعىن زاڭنامادا بەلگىلەنگەن تارتىپپەن قورعاي الادى.
سونداي-اق مينيسترلىك قازاقستاندا ءماتىنى قىسقارتىلعان نەمەسە وزگەرتىلگەن كىتاپتاردىڭ سانى تۋرالى دەرەك جوق ەكەنىن حابارلادى. ويتكەنى ۆەدومستۆو كىتاپ دۇكەندەرىنىڭ اسسورتيمەنتىنە ەسەپ جۇرگىزبەيدى جانە يمپورتتالاتىن كوممەرتسيالىق باسىلىمداردىڭ مازمۇنىنا مونيتورينگ جاسامايدى.
