فوتو: sabaqtar.kz
"قازگيدرومەت" ماماندارى 26 شىلدەدە قازاقستاننىڭ بىرنەشە وڭىرىندە قولايسىز مەتەورولوگيالىق جاعداي قالىپتاسۋى مۇمكىن ەكەنىن ەسكەرتىپ، تۇرعىنداردى ساق بولۋعا شاقىردى، دەپ حابارلايدى «ادىرنا».
سينوپتيكتەردىڭ مالىمەتىنشە، كۇندىز اقتوبە قالاسىندا، ال تۇنگى ۋاقىتتا استانا مەن قوستانايدا اتموسفەرالىق اۋانىڭ لاستانۋىنا قولايلى جاعدايلار كۇتىلەدى.
قولايسىز مەتەورولوگيالىق جاعدايلار – جەلدىڭ ءالسىز سوعۋى نەمەسە مۇلدە بولماۋى، تۇمان مەن تەمپەراتۋرالىق ينۆەرسيا سياقتى تابيعي قۇبىلىستاردىڭ اسەرىنەن اتموسفەرانىڭ تومەنگى قاباتىندا زياندى زاتتاردىڭ شوعىرلانۋى. سونىڭ سالدارىنان اۋا ساپاسى ۋاقىتشا ناشارلاۋى مۇمكىن.
وسىعان بايلانىستى ماماندار تۇرعىندارعا، اسىرەسە اۆتوكولىك قوزعالىسى قارقىندى كوشەلەر مەن ونەركاسىپتىك ايماقتاردىڭ ماڭىندا ۇزاق ۋاقىت بولماۋعا كەڭەس بەرەدى.
سونداي-اق تىنىس الۋ جۇيەسى، جۇرەك-قان تامىرلارى اۋرۋلارى نەمەسە اللەرگياسى بار ازاماتتارعا قاجەت بولعان جاعدايدا ءدارى-دارمەكتەرىن وزدەرىمەن بىرگە الىپ ءجۇرۋ جانە مۇمكىندىگىنشە اشىق اۋادا ۇزاق سەرۋەندەۋدەن باس تارتۋ ۇسىنىلادى.
