ۋكراينانىڭ سىرتقى ىستەر ءمينيسترى اندرەي سىبيگا پرەزيدەنت قاسىم-جومارت توقاەۆتىڭ رەسەي-ۋكراينا قاقتىعىسىن توقتاتۋ تۋرالى ۇسىنىسىن قولدادى. ءتيىستى مالىمدەمەنى ول ح الەۋمەتتىك جەلىسىندەگى پاراقشاسىندا جاريالادى، دەپ حابارلايدى «ادىرنا» ءتىلشىسى lenta.ru-عا سىلتەمە جاساپ.
«پرەزيدەنت قاسىم-جومارت توقاەۆتىڭ رەسەي پرەزيدەنتى ۆلاديمير پۋتينگە سوعىستى توقتاتاتىن ۋاقىت كەلگەنى تۋرالى ۇندەۋىن جوعارى باعالايمىز. بۇل – شىنايى جاعدايعا نەگىزدەلگەن، دەر كەزىندە ايتىلعان، دانا مالىمدەمە»، – دەپ جازدى ديپلومات.
سىبيگا ۋكراينا سوعىستى توقتاتۋعا باعىتتالعان كەز كەلگەن سىندارلى باستامانى قۇپتايتىنىن اتاپ ءوتتى. الايدا ول كەلىسسوزدەردە ەلدىڭ ەگەمەندىگى مەن اۋماقتىق تۇتاستىعى ەسكەرىلۋى ءتيىس ەكەنىن باسا ايتتى. سونىمەن قاتار كيەۆ ديالوگقا دايىن ەكەنىن، بىراق ول ۋكراينا مۇددەلەرى مەن حالىقارالىق قۇقىق نورمالارىنا ساي شارتتار نەگىزىندە عانا جۇرگىزىلۋى كەرەكتىگىن جەتكىزدى.
ەسكە سالايىق، بۇعان دەيىن پرەزيدەنت قاسىم-جومارت توقاەۆ ومبىدا رەسەي-ۋكراينا قاقتىعىسىن ۋاقىتشا توقتاتۋعا شاقىرعان ەدى. مەملەكەت باسشىسى قازاقستاننىڭ بەيبىتشىلىك پەن ديالوگتى قولدايتىنىن اتاپ ءوتتى.
