فوتو: caliber.az
رەسەي كۇشتەرى كيەۆتەگى دنەپر وزەنى ارقىلى وتەتىن سولتۇستىك كوپىرگە جاڭا سوققى جاسادى. بۇل تۋرالى كيەۆ قالاسىنىڭ مەرى ۆيتالي كليچكو مالىمدەدى، دەپ حابارلايدى "ادىرنا".
«سولتۇستىك كوپىردىڭ جول جابىنىنا سوققى ءتيدى. توتەنشە جاعدايلار قىزمەتتەرى وقيعا ورنىنا بارا جاتىر»، – دەدى كليچكو.
جەرگىلىكتى اقپارات ارنالارى سوققى ءساتى مەن ونىڭ سالدارىن كورسەتەتىن بەينەجازبالار جاريالادى.
3 قازاندا رەسەي اسكەرىنىڭ ۋكرايناعا جاساعان سوققىلارى سالدارىنان كيەۆتەگى سولتۇستىك كوپىر زاقىمداندى. حاركوۆ وبلىسىندا بەس ادام قازا تاپسا، ودەسسا وبلىسىندا ليبەريا تۋى استىندا جۇزگەن ازاماتتىق جۇك كەمەسىنە سوققى جاسالدى.
ۋكراينانىڭ ۋنيان اگەنتتىگىنىڭ مالىمەتىنشە، كيەۆتەگى كوپىرگە جاسالعان سوققىدان جول جابىنى مەن تروللەيبۋس بايلانىس جەلىسى زاقىمدانعان. سول جاعالاۋدان وڭ جاعالاۋعا قاراي قوزعالىس ۋاقىتشا توقتاتىلدى.
كيەۆ مەرى ۆيتالي كليچكو سوققى سالدارىنان ەكى ادامنىڭ زارداپ شەككەنىن حابارلادى. ولاردىڭ بىرىنە مەديتسينالىق كومەك وقيعا ورنىندا كورسەتىلسە، ەكىنشىسى اۋرۋحاناعا جەتكىزىلدى. كەيىن ول امبۋلاتوريالىق ەم الۋعا اۋىستىرىلعان.
رەسەي كۇشتەرى حاركوۆ قالاسىنا دا باسقارىلاتىن اۆياتسيالىق بومبالارمەن سوققى جاساعان. شابۋىلدان زارداپ شەككەندەر سانى 42 ادامعا جەتتى. ولاردىڭ اراسىندا ءۇش بالا بار.
قازا تاپقاندار اراسىندا 66 جانە 80 جاستاعى ەكى ايەل بولعان.
جالپى، ءبىر تاۋلىك ىشىندە حاركوۆ وبلىسىندا رەسەيدىڭ سوققىلارىنان بەس ادام قازا تاۋىپ، 49 ادام جارالانعان.
ودەسسا وبلىسىندا جۇك كەمەسى زاقىمداندى
سونىمەن قاتار رەسەي اسكەرىنىڭ سوققىسىنا ودەسسا وبلىسىنداعى پورتتاردىڭ بىرىندە تۇرعان ليبەريا تۋى استىنداعى ازاماتتىق جۇك كەمەسى ۇشىراعان.
ۋكراينا تەڭىز پورتتارى اكىمشىلىگىنىڭ مالىمەتىنشە، شابۋىل سالدارىنان كەمە مەحانيگى قازا تاۋىپ، ەكيپاجدىڭ تاعى ءۇش مۇشەسى جارالانعان.
كەمەدەگى 13 ەكيپاج مۇشەسى قاۋىپسىز جەرگە ەۆاكۋاتسيالاندى.
