الماتى اۋەجايىندا رەسەيلىك ازاماتشا، قۇقىق قورعاۋشىلار بەلسەندى دەپ اتاپ جۇرگەن يۋليا ەمەليانوۆا ۇستالدى، دەپ حابارلايدى “ادىرنا” ۇلتتىق پورتالى ۆۆس-گە سىلتەپ.
ول باسقا ەلگە ترانزيتپەن ۇشىپ بارا جاتقان كەزدە پاسپورتتىق باقىلاۋدا توقتاتىلعان.
قازاقستاندىق شەكاراشىلاردىڭ ايتۋىنشا، ەمەليانوۆا رەسەيدىڭ سۇراۋى بويىنشا ىزدەۋدە بولعان. وعان رف قىلمىستىق كودەكسىنىڭ 158-بابىنا («ۇرلىق») سايكەس ايىپ تاعىلىپ وتىر. تەرگەۋ نۇسقاسىنا سايكەس، 2021 جىلى سانكت-پەتەربۋرگتە تاكسيستىڭ تەلەفونىن ۇرلادى دەگەن كۇدىككە ىلىنگەن.
الايدا قۇقىق قورعاۋشىلار ءىستىڭ ساياسي استارى بار ەكەنىن العا تارتادى. قازاقستانداعى حالىقارالىق قۇقىق قورعاۋ بيۋروسىنىڭ زاڭگەرى ارتۋر الحاستوۆ BBC-گە بەرگەن سۇحباتىندا جاعداي تۋرالى ايتتى.
«ول باسقا ەلگە ترانزيتتىك رەيسپەن ۇشىپ كەلە جاتقان. الماتىدا اۋەجاي اۋىستىرۋ ءۇشىن پاسپورتتىق باقىلاۋدان وتۋگە تۋرا كەلدى. ءدال وسى — ۇلكەن قاتەلىك بولدى»، — دەپ مالىمدەدى ول.
قۇقىق قورعاۋشىلاردىڭ ايتۋىنشا، ەمەليانوۆا 2021 جىلى پەتەربۋرگتەگى پوليتسيا بولىمشەسىنە كۇشتەپ جەتكىزىلىپ، ءدال سول جەردە تاكسيستىڭ تەلەفونىن «قىلمىس ايعاعى» رەتىندە كورسەتكەن.
بەلسەندىنىڭ جاقتاستارى ونىڭ ءىسى رەسەيدەگى ازاماتتىق ۇستانىمى ءۇشىن قولدان جاسالعانىنا سەنىمدى. ەمەليانوۆا ۋكرايناداعى سوعىس باستالعانعا دەيىن سانكت-پەتەربۋرگتەگى ناۆالنىي شتابىنىڭ ەرىكتىسى بولعان.
قازىر 34 جاستاعى يۋليا ەمەليانوۆا الماتىداعى ۋاقىتشا قاماۋ يزولياتورىندا وتىر. ونى رەسەيگە ەكستراديتسيالاۋ ماسەلەسى قارالۋى مۇمكىن.
