الماتىنىڭ الاتاۋ اۋدانىندا بولعان جول-كولىك وقيعاسى سالدارىنان ەكى ادام قازا تاۋىپ، تاعى ەكى ادام جاراقات الدى، دەپ حابارلايدى «ادىرنا» ءتىلشىسى.
قالالىق پوليتسيا دەپارتامەنتىنىڭ مالىمەتىنشە، جول اپاتى بۇگىن، 27 شىلدەدە تۇنگى ساعات 03:10 شاماسىندا بولعان.
الدىن الا مالىمەتتەر بويىنشا، رىسقۇلوۆ داڭعىلىمەن باتىس باعىتتا كەلە جاتقان Suzuki كولىگىنىڭ جۇرگىزۋشىسى ءشارىپوۆ كوشەسىنىڭ قيىلىسىندا كەرى بۇرىلماق بولعان كەزدە رىسقۇلوۆ داڭعىلىمەن شىعىس باعىتتا كەلە جاتقان Mercedes كولىگىمەن سوقتىعىسقان.
سوقتىعىس سالدارىنان Suzuki كولىگىنىڭ جۇرگىزۋشىسى مەن جولاۋشىسى العان جاراقاتتارىنان وقيعا ورنىندا كوز جۇمدى.
«Suzuki اۆتوكولىگىندەگى تاعى ءبىر جولاۋشى جانە Mercedes جۇرگىزۋشىسى ءتۇرلى دەنە جاراقاتتارىمەن مەديتسينالىق مەكەمەگە جەتكىزىلدى»، – دەپ تولىقتىردى پد وكىلدەرى.
وقيعا ورنىنان تاراعان سۋرەتتە Mercedes كولىگىنىڭ Geländewagen نۇسقاسى ەكەنى بايقالعان.
ەكى ادامنىڭ قازا بولۋىنا اكەلگەن جول-كولىك وقيعاسى فاكتىسى بويىنشا قىلمىستىق ءىس قوزعالعان. قازىرگى ۋاقىتتا اپاتتىڭ بارلىق ءمان-جايى انىقتالىپ جاتىر.
