تۇركىمەنستان كاسپي تەڭىزىندەگى كەمەلەرگە جاسالعان شابۋىلداردى جول بەرۋگە بولمايتىن ارەكەت دەپ سانايدى. بۇل تۋرالى ەلدىڭ سىرتقى ىستەر مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«25 شىلدەدە حالىقارالىق بۇقارالىق اقپارات قۇرالدارىندا كاسپي تەڭىزى اكۆاتورياسىنداعى كەمەگە جاسالعان شابۋىل تۋرالى اقپارات جاريالاندى. وسىعان بايلانىستى تۇركىمەنستان سىرتقى ىستەر مينيسترلىگى مۇنداي ارەكەتتەردىڭ جول بەرىلمەيتىنىن مالىمدەيدى»، – دەلىنگەن دۇيسەنبى كۇنى جاريالانعان حابارلامادا.
ۆەدومستۆونىڭ مالىمەتىنشە، بۇۇ مويىنداعان تۇراقتى بەيتاراپ مارتەبەگە يە ءارى كاسپي ماڭى مەملەكەتتەرىنىڭ ءبىرى سانالاتىن تۇركىمەنستان كاسپي تەڭىزى بەيبىتشىلىك، كەلىسىم جانە تاتۋ كورشىلىك ايماعى بولۋى ءتيىس ەكەنىن اتاپ وتكەن.
بۇعان دەيىن يران 25 شىلدە كۇنى تاڭەرتەڭ ۋكراينا اسكەرى كاسپي تەڭىزىندە يران تۋى استىندا ءجۇزىپ جۇرگەن كەمەگە سوققى جاساعانىن حابارلاعان بولاتىن. سالدارىنان ءبىر تەڭىزشى قازا تاۋىپ، تاعى ءبىرى جارالانعان.
ازاماتتىق جۇك تاسىمالداعان كەمە رەسەيدىڭ استراحان پورتىنان يراننىڭ ەنزەلي پورتىنا باعىت العان. يران پارلامەنتىنىڭ سىرتقى ساياسات جانە ۇلتتىق قاۋىپسىزدىك جونىندەگى كوميسسياسىنىڭ توراعاسى ەبراحيم ازيزي ۋكراينا جاساعان بۇل شابۋىل جاۋاپسىز قالمايتىنىن مالىمدەدى.
